തിരുവനന്തപുരം: കേരള ഇൻഫ്രാസ്ട്രക്ചർ ഇൻവെസ്റ്റ്‌മെന്റ് ഫണ്ട് ബോർഡിന്റെ (കിഫ്ബി) പ്രവർത്തനങ്ങൾ സംസ്ഥാനത്തിന് വരുംവർഷങ്ങളിൽ 70,415.54 കോടി രൂപയുടെ സാമ്പത്തിക ബാധ്യത സൃഷ്ടിച്ചിട്ടുണ്ടെന്ന് വിദഗ്ധ സമിതി റിപ്പോർട്ട്. വായ്പകളുടെ തിരിച്ചടവും നിലവിലുള്ള പദ്ധതികളുടെ പൂർത്തീകരണവും ഉൾപ്പെടെയുള്ള ചെലവുകളാണ് ഇത്രയും വലിയ ബാധ്യതയ്ക്ക് കാരണമാകുന്നത്. 2041-42 സാമ്പത്തിക വർഷം വരെ വായ്പ തിരിച്ചടവ് തുടരുമെന്നും ഭൂമി ഏറ്റെടുക്കുന്നതിനുള്ള ചെലവുകൾ ഈ തുകയിൽ ഉൾപ്പെട്ടിട്ടില്ലെന്നും റിപ്പോർട്ട് വ്യക്തമാക്കുന്നു.
കഴിഞ്ഞ പത്തുവർഷത്തെ കിഫ്ബിയുടെ പ്രവർത്തനങ്ങൾ സംസ്ഥാന സർക്കാർ വകുപ്പുകളുടെ ഭരണപരമായ കാര്യക്ഷമതയെയും പ്രവർത്തനശേഷിയെയും പ്രതികൂലമായി ബാധിച്ചതായും സമിതി വിലയിരുത്തി. സാമ്പത്തിക ആസൂത്രണത്തിലെ വീഴ്ചകൾ, ഉയർന്ന പലിശനിരക്കിലുള്ള വായ്പകൾ, നിയമനങ്ങളിലെ ക്രമക്കേടുകൾ, ഫണ്ട് വിനിയോഗത്തിലെ അസന്തുലിതാവസ്ഥ തുടങ്ങിയ ഗുരുതര പ്രശ്നങ്ങളാണ് റിപ്പോർട്ടിൽ ചൂണ്ടിക്കാട്ടുന്നത്.
കിഫ്ബി എടുത്ത വായ്പകളുടെ ഉയർന്ന പലിശനിരക്ക് കാരണം പ്രതിവർഷം 396 കോടി രൂപയുടെ അധിക ചെലവുണ്ടായതായി റിപ്പോർട്ട് കണ്ടെത്തി. മസാല ബോണ്ടുകൾ വഴിയുള്ള ധനസമാഹരണം മാത്രം 181.73 കോടി രൂപയുടെ അധിക സാമ്പത്തിക ബാധ്യതയ്ക്കും കാരണമായി.
ഉയർന്ന പലിശ നൽകി സമാഹരിച്ച പണം മാസങ്ങളോളം വിനിയോഗിക്കാതെ സൂക്ഷിച്ചിരുന്നതും സമിതി ഗൗരവമായി കാണുന്നു. വായ്പയെടുത്ത തുക പദ്ധതികൾക്കായി സമയബന്ധിതമായി വിനിയോഗിക്കാതിരുന്നത് സാമ്പത്തിക നഷ്ടത്തിന് ഇടയാക്കിയെന്നാണ് വിലയിരുത്തൽ.
2022 മുതൽ കിഫ്ബിയുടെ വായ്പകൾ സംസ്ഥാന സർക്കാരിന്റെ കടമെടുക്കൽ പരിധിയിൽ ഉൾപ്പെടുത്തിയിരുന്നു. ഇതോടെ ഇത്തരം വായ്പകൾക്ക് പ്രത്യേക സർക്കാർ ഗ്യാരണ്ടി നൽകേണ്ടതില്ലെന്ന് ധനകാര്യ വകുപ്പ് തീരുമാനിച്ചു. എന്നാൽ 2023 ജൂൺ ആറിന് അന്നത്തെ മുഖ്യമന്ത്രിയുടെ അധ്യക്ഷതയിൽ ചേർന്ന യോഗത്തിൽ ഈ തീരുമാനം റദ്ദാക്കി.
ധനകാര്യ വകുപ്പിന്റെ തീരുമാനം റദ്ദാക്കാനുള്ള അധികാരം മന്ത്രിസഭയ്ക്കു മാത്രമാണെന്നിരിക്കെ, യോഗത്തിലൂടെ തീരുമാനം മാറ്റിയത് നടപടിക്രമങ്ങളുടെ ലംഘനമാണെന്ന് റിപ്പോർട്ട് ചൂണ്ടിക്കാട്ടുന്നു.
കിഫ്ബിയുടെ ഭരണസംവിധാനത്തിലും ജീവനക്കാരുടെ നിയമനങ്ങളിലും വ്യാപകമായ ക്രമക്കേടുകൾ നടന്നതായി സമിതി കണ്ടെത്തി. തുടക്കത്തിൽ 40 തസ്തികകൾ മാത്രം അനുവദിച്ചിരുന്ന സ്ഥാപനത്തിൽ 498 പേരെ നിയമിച്ചതായി റിപ്പോർട്ടിൽ പറയുന്നു.
കിഫ്ബി ചീഫ് എക്സിക്യൂട്ടീവ് ഓഫീസർ എക്സ്-ഒഫീഷ്യോ സെക്രട്ടറിയായി പ്രവർത്തിച്ചതും നിയമപരമായ ചോദ്യങ്ങൾ ഉയർത്തുന്നതായി റിപ്പോർട്ട് വിലയിരുത്തുന്നു. കൺസൾട്ടന്റുമാർക്കുള്ള പ്രതിഫല വിതരണത്തിലെ സുതാര്യതക്കുറവ്, ഭൂമി ഏറ്റെടുക്കലുമായി ബന്ധപ്പെട്ട ക്രമക്കേടുകൾ എന്നിവയും പ്രധാന കണ്ടെത്തലുകളാണ്.
കിഫ്ബി പദ്ധതികൾക്കായി അനുവദിച്ച തുകയുടെ വിതരണത്തിലും വലിയ അസമത്വം നിലനിൽക്കുന്നതായി റിപ്പോർട്ട് വ്യക്തമാക്കുന്നു.
പൊതുമരാമത്ത് വകുപ്പിന് മൊത്തം ഫണ്ടിന്റെ 52.6 ശതമാനം ലഭിച്ചപ്പോൾ പട്ടികജാതി, പട്ടികവർഗ വിഭാഗങ്ങൾക്കായുള്ള പദ്ധതികൾക്ക് ലഭിച്ചത് വെറും 0.18 ശതമാനം മാത്രമാണ്. സാമൂഹികമായി പിന്നാക്കം നിൽക്കുന്ന വിഭാഗങ്ങൾക്കുള്ള അടിസ്ഥാനസൗകര്യ വികസനത്തിന് മതിയായ പരിഗണന ലഭിച്ചില്ലെന്ന വിമർശനത്തിനും ഈ കണക്കുകൾ ഇടയാക്കുന്നു.
കിഫ്ബിയുടെ വായ്പകൾ സംസ്ഥാന സർക്കാരിന്റെ കടബാധ്യതയുടെ ഭാഗമായി കണക്കാക്കിയതിനെ തുടർന്ന് കേരളത്തിന്റെ കടമെടുക്കൽ പരിധിയിൽ കേന്ദ്ര സർക്കാർ 25,932.55 കോടി രൂപയുടെ കുറവ് വരുത്തിയതായി റിപ്പോർട്ട് ചൂണ്ടിക്കാട്ടുന്നു.
പദ്ധതികളുടെ നടത്തിപ്പുമായി ബന്ധപ്പെട്ട് 13,103 കോടി രൂപയുടെ അധിക ചെലവുണ്ടായതായും സമിതി കണ്ടെത്തി. സർക്കാർ സോവറിൻ ഗ്യാരണ്ടി നിലനിൽക്കുമ്പോഴും കിഫ്ബി നടത്തിയ ഏകദേശം 5,821 കോടി രൂപയുടെ നിക്ഷേപത്തിന്റെ ആവശ്യകതയെയും സാമ്പത്തിക യുക്തിയെയും റിപ്പോർട്ട് ചോദ്യം ചെയ്യുന്നു.
കിഫ്ബിയുടെ സാമ്പത്തിക ബാധ്യത നിയന്ത്രിക്കാനും പ്രവർത്തനങ്ങളിൽ സുതാര്യത ഉറപ്പാക്കാനും സമിതി നിരവധി നിർദേശങ്ങൾ മുന്നോട്ടുവച്ചിട്ടുണ്ട്.
കിഫ്ബി വായ്പകളുടെ തിരിച്ചടവിനായി സംസ്ഥാന ബജറ്റിൽ പ്രത്യേക തുക വകയിരുത്തണമെന്നതാണ് പ്രധാന ശുപാർശ. ഉയർന്ന പലിശനിരക്കിലുള്ള നിലവിലെ വായ്പകൾക്ക് പകരം കുറഞ്ഞ പലിശയിലുള്ള വായ്പകൾ കണ്ടെത്തി സാമ്പത്തിക ബാധ്യത കുറയ്ക്കണമെന്നും നിർദേശിക്കുന്നു.
നിർമാണം പുരോഗമിക്കുന്ന പദ്ധതികൾ പൂർത്തിയാക്കുന്നതിന് ആവശ്യമായ തുക ബജറ്റിലൂടെ ഉറപ്പാക്കണം. പദ്ധതികളുടെ വിലയിരുത്തൽ ചുമതല സംസ്ഥാന ആസൂത്രണ ബോർഡിന് കൈമാറണമെന്നും സമിതി ശുപാർശ ചെയ്തു.
ജീവനക്കാരുടെ ശമ്പളഘടനയും സേവന വ്യവസ്ഥകളും പുനഃക്രമീകരിക്കണം. നിയമനങ്ങൾ നടത്താനുള്ള ചീഫ് എക്സിക്യൂട്ടീവ് ഓഫീസറുടെ അധികാരം ഒഴിവാക്കി കൂടുതൽ ഉത്തരവാദിത്തമുള്ള ഭരണസംവിധാനം ഏർപ്പെടുത്തണമെന്നും റിപ്പോർട്ട് ആവശ്യപ്പെടുന്നു.
കിഫ്ബിയുടെ വായ്പാനയവും സാമ്പത്തിക ഇടപാടുകളും ഭരണസംവിധാനവും സമഗ്രമായി പുനഃപരിശോധിക്കേണ്ടതിന്റെ ആവശ്യകതയാണ് വിദഗ്ധ സമിതി റിപ്പോർട്ട് മുന്നോട്ടുവയ്ക്കുന്നത്. ദീർഘകാല കടബാധ്യതയും പദ്ധതികളുടെ അധിക ചെലവും സംസ്ഥാനത്തിന്റെ സാമ്പത്തിക ആസൂത്രണത്തിന് വലിയ വെല്ലുവിളിയാകുമെന്ന മുന്നറിയിപ്പും റിപ്പോർട്ടിലെ കണ്ടെത്തലുകൾ നൽകുന്നു.
