യുഡിഎഫിൽ കൂടിയാലോചനയില്ലെന്ന വിമർശനത്തിൽ പിന്നോട്ടില്ല; ഡൽഹിയിലെത്തി ഹൈക്കമാൻഡിനെ നേരിട്ട് കാണും, മറുപരാതിക്ക് സതീശൻ വിഭാഗവും നീക്കം
തിരുവനന്തപുരം: യുഡിഎഫിലെയും കോൺഗ്രസ് നേതൃത്വത്തിലെയും തീരുമാനമെടുക്കൽ രീതിക്കെതിരെ പരസ്യമായി വിമർശനം ഉന്നയിച്ച യുഡിഎഫ് കൺവീനറും എംപിയുമായ അടൂർ പ്രകാശ് നിലപാടിൽ ഉറച്ചുനിൽക്കുന്നു. മുന്നണിയിൽ ആവശ്യമായ കൂടിയാലോചനകൾ നടക്കുന്നില്ലെന്നതുൾപ്പെടെ താൻ ഉന്നയിച്ച വിഷയങ്ങൾ തിങ്കളാഴ്ച ഡൽഹിയിലെത്തി എഐസിസി നേതൃത്വത്തെ രേഖാമൂലം അറിയിക്കാനാണ് തീരുമാനം. ഇതോടെ കോൺഗ്രസിനുള്ളിലെ ഭിന്നത ഹൈക്കമാൻഡിന് മുന്നിലെത്തുകയാണ്.
കേരളത്തിലെ യുഡിഎഫിന്റെ പ്രവർത്തനരീതിയിലും സുപ്രധാന തീരുമാനങ്ങൾ കൈക്കൊള്ളുന്നതിലും മതിയായ കൂടിയാലോചന നടക്കുന്നില്ലെന്നാണ് അടൂർ പ്രകാശിന്റെ പ്രധാന വിമർശനം. മുന്നണി സംവിധാനവുമായി ബന്ധപ്പെട്ട നിരവധി കാര്യങ്ങൾ ഉത്തരവാദിത്തപ്പെട്ട സ്ഥാനത്തിരിക്കുന്ന താൻ പോലും മാധ്യമങ്ങളിലൂടെയാണ് അറിയുന്നതെന്നും ഈ സാഹചര്യം തുടരാനാകില്ലെന്നുമാണ് അദ്ദേഹത്തിന്റെ നിലപാട്.
താൻ ഉന്നയിച്ച പരാതികളും സംഘടനാപരമായ വിഷയങ്ങളും വിശദമായി രേഖപ്പെടുത്തി എഐസിസി നേതൃത്വത്തിന് കൈമാറുമെന്ന് അടൂർ പ്രകാശ് വ്യക്തമാക്കിയിട്ടുണ്ട്. പരസ്യമായി ഉന്നയിച്ച വിമർശനങ്ങളിൽ നിന്ന് പിന്നോട്ടില്ലെന്ന സൂചന കൂടിയാണ് ഹൈക്കമാൻഡിനെ നേരിട്ട് സമീപിക്കാനുള്ള തീരുമാനം നൽകുന്നത്.
അതേസമയം, കെപിസിസി പ്രസിഡന്റ് സണ്ണി ജോസഫും സംസ്ഥാനത്തെ പുതിയ രാഷ്ട്രീയ സാഹചര്യങ്ങൾ കോൺഗ്രസ് ഹൈക്കമാൻഡിനെ ധരിപ്പിക്കുമെന്നാണ് വിവരം. പിസിസി അധ്യക്ഷന്മാരുടെ യോഗത്തിൽ പങ്കെടുക്കുന്നതിനായി ഡൽഹിയിലെത്തുന്ന സണ്ണി ജോസഫ്, അടൂർ പ്രകാശിന്റെ പരസ്യവിമർശനം ഉൾപ്പെടെയുള്ള കാര്യങ്ങൾ ദേശീയ നേതൃത്വത്തിന്റെ ശ്രദ്ധയിൽപ്പെടുത്തും.
അടൂർ പ്രകാശ് ഔദ്യോഗികമായി ഹൈക്കമാൻഡിന് പരാതി നൽകിയാൽ അദ്ദേഹത്തിനെതിരെ സംഘടനാതല നടപടി ആവശ്യപ്പെട്ട് മറുപരാതി നൽകാനുള്ള നീക്കവും വി.ഡി. സതീശനെ പിന്തുണയ്ക്കുന്ന വിഭാഗത്തിൽ സജീവമാണ്. മുന്നണിയുടെയും പാർട്ടിയുടെയും ആഭ്യന്തര വിഷയങ്ങൾ പൊതുവേദിയിൽ ഉന്നയിച്ചത് സംഘടനാ അച്ചടക്കത്തിന് വിരുദ്ധമാണെന്ന വാദമായിരിക്കും ഇവർ പ്രധാനമായും മുന്നോട്ടുവയ്ക്കുക.
എം.കെ. മുനീറിനും ജി. ദേവരാജനും ക്യാബിനറ്റ് പദവി നൽകിയതുൾപ്പെടെയുള്ള സുപ്രധാന തീരുമാനങ്ങൾ യുഡിഎഫിൽ വേണ്ടത്ര ചർച്ച ചെയ്യാതെയാണ് കൈക്കൊണ്ടതെന്നായിരുന്നു അടൂർ പ്രകാശിന്റെ ആരോപണം. യുഡിഎഫിൽ നിർണായക ഉത്തരവാദിത്തമുള്ള തന്നെ പല കാര്യങ്ങളും അറിയിക്കുന്നില്ലെന്നും അദ്ദേഹം തുറന്നടിച്ചിരുന്നു.
പല സുപ്രധാന തീരുമാനങ്ങളും മാധ്യമങ്ങളിലൂടെയാണ് അറിയുന്നതെന്നും അത് ദുഃഖകരമായ സാഹചര്യമാണെന്നും അടൂർ പ്രകാശ് ചൂണ്ടിക്കാട്ടി. യുഡിഎഫ് യോഗങ്ങൾ കൃത്യമായി ചേരാത്തതിനാൽ വിവിധ വിഷയങ്ങളിൽ മാധ്യമങ്ങളോ പൊതുസമൂഹമോ ചോദ്യങ്ങൾ ഉന്നയിക്കുമ്പോൾ വ്യക്തമായ മറുപടി നൽകാൻ പോലും കഴിയാത്ത അവസ്ഥയാണെന്നും അദ്ദേഹം പരാതിപ്പെട്ടിരുന്നു.
ഇത്തരം പ്രശ്നങ്ങൾ ഇനിയും മറച്ചുവച്ചുകൊണ്ട് മുന്നോട്ടുപോകുന്നതിൽ അർഥമില്ലെന്ന് തോന്നിയതിനാലാണ് പരസ്യമായി പ്രതികരിച്ചതെന്നായിരുന്നു അടൂർ പ്രകാശിന്റെ വിശദീകരണം. മുഖ്യമന്ത്രി വി.ഡി. സതീശന്റെ നേതൃത്വശൈലിയെയും മുന്നണിയിലെ തീരുമാനമെടുക്കൽ രീതിയെയും ലക്ഷ്യമിട്ടായിരുന്നു അദ്ദേഹത്തിന്റെ വിമർശനങ്ങളെന്ന വിലയിരുത്തലും ശക്തമാണ്.
അടൂർ പ്രകാശിന്റെ പരസ്യപ്രതികരണത്തിൽ യുഡിഎഫിലെ പ്രധാന ഘടകകക്ഷിയായ മുസ്‌ലിം ലീഗും അതൃപ്തി പ്രകടിപ്പിച്ചിട്ടുണ്ട്. നിലവിലെ രാഷ്ട്രീയ സാഹചര്യത്തിൽ ഇത്തരമൊരു പരസ്യവിമർശനം അനവസരത്തിലാണെന്നും ഇത് രാഷ്ട്രീയ എതിരാളികൾക്ക് യുഡിഎഫിനെതിരെ ഉപയോഗിക്കാൻ ആയുധം നൽകുമെന്നും ലീഗ് നേതൃത്വം വിലയിരുത്തുന്നു.
കോൺഗ്രസിനുള്ളിലെ ആഭ്യന്തര ചേരിപ്പോരിലേക്ക് മുസ്‌ലിം ലീഗിനെയും അതിന്റെ നേതാക്കളെയും അനാവശ്യമായി വലിച്ചിഴച്ചതാണ് ലീഗ് സംസ്ഥാന നേതൃത്വത്തെ കൂടുതൽ അസ്വസ്ഥരാക്കിയത്. പ്രത്യേകിച്ച് എം.കെ. മുനീറിന് പദവി നൽകിയ വിഷയം കോൺഗ്രസിലെ ആഭ്യന്തര തർക്കത്തിന്റെ ഭാഗമായി ഉയർത്തിക്കാട്ടിയതിലാണ് ലീഗിന് എതിർപ്പ്.
മുനീറിന് പദവി നൽകുന്നതുമായി ബന്ധപ്പെട്ട് വി.ഡി. സതീശൻ, കെ.സി. വേണുഗോപാൽ തുടങ്ങിയ മുതിർന്ന കോൺഗ്രസ് നേതാക്കളുമായി നേരത്തെ തന്നെ ആശയവിനിമയം നടത്തിയ ശേഷമാണ് അന്തിമ തീരുമാനത്തിലെത്തിയതെന്നാണ് ലീഗ് വൃത്തങ്ങളുടെ നിലപാട്. ഈ പശ്ചാത്തലത്തിൽ വിഷയം വീണ്ടും പരസ്യമായി ഉയർത്തിയത് അനാവശ്യ വിവാദത്തിനാണ് വഴിവച്ചതെന്നാണ് വിലയിരുത്തൽ.
അടൂർ പ്രകാശ് എഐസിസിക്ക് പരാതി നൽകുകയും മറുവശത്ത് അദ്ദേഹത്തിനെതിരെ സംഘടനാ നടപടി ആവശ്യപ്പെട്ട് മറ്റൊരു വിഭാഗം ഹൈക്കമാൻഡിനെ സമീപിക്കുകയും ചെയ്താൽ തർക്കം കൂടുതൽ രൂക്ഷമാകാനാണ് സാധ്യത. നിയമസഭാ തിരഞ്ഞെടുപ്പിന് ശേഷമുള്ള യുഡിഎഫ് രാഷ്ട്രീയത്തിൽ നേതൃത്വവും തീരുമാനമെടുക്കൽ രീതിയും സംബന്ധിച്ച അസ്വാരസ്യങ്ങൾ പരസ്യമായി പുറത്തുവരുന്നത് മുന്നണിക്കും കോൺഗ്രസിനും പുതിയ തലവേദനയായി മാറുകയാണ്.
