പ്രധാനമന്ത്രിക്കും തിരഞ്ഞെടുപ്പ് കമ്മീഷനുമെതിരായ പരാമർശങ്ങളിൽ രാഹുൽ ഗാന്ധി മാപ്പ് പറയണമെന്ന് ആവശ്യം; ഇല്ലെങ്കിൽ ‘ഫ്രോഡ്’ വിളി തുടരുമെന്നും ബിജെപി സംസ്ഥാന അധ്യക്ഷൻ
തിരുവനന്തപുരം: കോൺഗ്രസ് നേതാവ് രാഹുൽ ഗാന്ധിക്കെതിരായ ‘ഫ്രോഡ്’ പരാമർശത്തിൽ ഉറച്ചുനിന്ന് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ. രാഹുൽ ഗാന്ധിയുടെ രാഷ്ട്രീയം വഞ്ചനയിലും അഴിമതിയിലും കെട്ടിപ്പടുത്തതാണെന്നാണ് രാജീവ് ചന്ദ്രശേഖറുടെ ആരോപണം. രാഹുലിനെ ‘ഫ്രോഡ്’ എന്ന് വിശേഷിപ്പിക്കാൻ തനിക്ക് മടിയില്ലെന്നും അദ്ദേഹം ഫേസ്ബുക്ക് കുറിപ്പിലൂടെ വ്യക്തമാക്കി.
രാഹുൽ ഗാന്ധിക്കെതിരായ തന്റെ പരാമർശത്തെ മുഖ്യമന്ത്രി വി.ഡി. സതീശൻ വിമർശിച്ചതിന് പിന്നാലെയാണ് രാജീവ് ചന്ദ്രശേഖറുടെ വിശദമായ പ്രതികരണം. രാഷ്ട്രീയ എതിരാളികളെ വ്യക്തിപരമായി അധിക്ഷേപിക്കുന്നതിൽ പൊതുവെ താൽപര്യമില്ലെങ്കിലും രാഹുൽ ഗാന്ധിയുടെ കാര്യത്തിൽ തന്റെ നിലപാട് വ്യത്യസ്തമാണെന്നാണ് അദ്ദേഹം വ്യക്തമാക്കിയത്.
2014ന് ശേഷമുള്ള രാഹുൽ ഗാന്ധിയുടെ രാഷ്ട്രീയം നുണകളും അധിക്ഷേപങ്ങളും വിഭജനവും അടിസ്ഥാനമാക്കിയുള്ളതാണെന്ന് രാജീവ് ചന്ദ്രശേഖർ ആരോപിച്ചു. രാജ്യത്തെയും ഭരണഘടനാ സ്ഥാപനങ്ങളെയും അപകീർത്തിപ്പെടുത്തുന്ന പ്രചാരണങ്ങളാണ് രാഹുൽ നടത്തുന്നതെന്നും പ്രധാനമന്ത്രി നരേന്ദ്ര മോദിക്കും കേന്ദ്ര സർക്കാരിനും ബിജെപിക്കുമെതിരെ അടിസ്ഥാനരഹിതമായ ആരോപണങ്ങൾ ഉന്നയിക്കുന്നതാണ് അദ്ദേഹത്തിന്റെ രാഷ്ട്രീയ രീതിയെന്നും രാജീവ് ചന്ദ്രശേഖർ കുറ്റപ്പെടുത്തി.
കോൺഗ്രസ് ഭരിക്കുന്ന സംസ്ഥാനങ്ങളിൽ മുൻ യു.പി.എ ഭരണകാലത്തെ അഴിമതിയും ദുർഭരണവും ആവർത്തിക്കുകയാണെന്നും അദ്ദേഹം ആരോപിച്ചു. ഈ സാഹചര്യത്തിലാണ് രാഹുലിന്റെ രാഷ്ട്രീയം വഞ്ചനയിലും അഴിമതിയിലും കെട്ടിപ്പടുത്തതാണെന്ന് താൻ പറയുന്നതെന്നും രാജീവ് ചന്ദ്രശേഖർ വിശദീകരിച്ചു.
പ്രധാനമന്ത്രി നരേന്ദ്ര മോദിയെയും തിരഞ്ഞെടുപ്പ് കമ്മീഷനെയും ലക്ഷ്യമിട്ട് രാഹുൽ ഗാന്ധി നടത്തിയ പരാമർശങ്ങളെയും രാജീവ് ചന്ദ്രശേഖർ വിമർശിച്ചു. തിരഞ്ഞെടുപ്പ് കമ്മീഷൻ നൽകിയ വിശദീകരണം പരിശോധിച്ചാൽ എസ്.ഐ.ആറുമായി ബന്ധപ്പെട്ട് ഉയർത്തുന്ന ആരോപണങ്ങളുടെ യാഥാർഥ്യം വ്യക്തമാകുമെന്നാണ് അദ്ദേഹത്തിന്റെ വാദം.
രാഷ്ട്രീയത്തിൽ ബഹുമാനം ആവശ്യപ്പെട്ട് നേടിയെടുക്കുന്നതല്ലെന്നും രാജ്യത്തിനും ജനങ്ങൾക്കും വേണ്ടി പ്രവർത്തിച്ചാണ് അത് നേടേണ്ടതെന്നും രാജീവ് ചന്ദ്രശേഖർ പറഞ്ഞു. രാഹുൽ ഗാന്ധിയുടെ രാഷ്ട്രീയ ജീവിതത്തെയും കുടുംബ രാഷ്ട്രീയ പശ്ചാത്തലത്തെയും വിമർശിച്ച അദ്ദേഹം, ജനങ്ങളുടെ വിശ്വാസം നേടാൻ സേവനമാണ് പ്രധാനമെന്നും അഭിപ്രായപ്പെട്ടു.
എസ്.ഐ.ആർ വിഷയത്തിൽ കോൺഗ്രസ് ദേശീയ നേതൃത്വത്തിന്റെയും കേരളത്തിലെ ചില നേതാക്കളുടെയും നിലപാടുകൾ തമ്മിൽ പൊരുത്തക്കേടുണ്ടെന്നും രാജീവ് ചന്ദ്രശേഖർ ആരോപിച്ചു. വോട്ടർപട്ടികയുമായി ബന്ധപ്പെട്ട നടപടികളെ രാഷ്ട്രീയ താൽപര്യങ്ങൾക്കായി വിവാദമാക്കുകയാണെന്നും അദ്ദേഹം കുറ്റപ്പെടുത്തി.
അതേസമയം, തന്റെ ‘ഫ്രോഡ്’ പരാമർശം പിൻവലിക്കുന്നതിനുള്ള വ്യവസ്ഥയും രാജീവ് ചന്ദ്രശേഖർ മുന്നോട്ടുവച്ചു. പ്രധാനമന്ത്രി നരേന്ദ്ര മോദിക്കെതിരായ പരാമർശത്തിനും തിരഞ്ഞെടുപ്പ് കമ്മീഷനെതിരെ ഉന്നയിച്ച ആരോപണങ്ങൾക്കും രാഹുൽ ഗാന്ധി മാപ്പ് പറഞ്ഞാൽ ‘ഫ്രോഡ്’ എന്ന് വിളിക്കുന്നത് അവസാനിപ്പിക്കാമെന്നാണ് അദ്ദേഹം പറഞ്ഞത്.
മറിച്ച്, നുണകളും പാലിക്കാത്ത വാഗ്ദാനങ്ങളും അഴിമതിയും പ്രീണന രാഷ്ട്രീയവും രാഷ്ട്രീയ തന്ത്രമായി തുടരുകയാണെങ്കിൽ ശക്തമായ വിമർശനം തുടരുമെന്നും രാജീവ് ചന്ദ്രശേഖർ വ്യക്തമാക്കി. ഇതോടെ രാഹുൽ ഗാന്ധിയെച്ചൊല്ലിയുള്ള കോൺഗ്രസ്–ബിജെപി വാക്പോര് കേരള രാഷ്ട്രീയത്തിലും കൂടുതൽ ശക്തമാകുകയാണ്.
