വാഷിംഗ്ടണ്‍: യുഎസ് കോൺഗ്രസ് അംഗം ഇൽഹാൻ ഒമറിന്റെ ആസ്തി സംബന്ധിച്ച വെളിപ്പെടുത്തലുകളിൽ ഉണ്ടായതായി റിപ്പോർട്ട് ചെയ്യപ്പെട്ട തിരുത്തലിനെ ചോദ്യം ചെയ്ത് അമേരിക്കൻ പ്രസിഡന്റ് ഡൊണാൾഡ് ട്രംപ് രംഗത്ത്. സാമ്പത്തിക ക്രമക്കേടുകൾ നടന്നിരിക്കാമെന്ന ആരോപണവും അദ്ദേഹം ഉന്നയിച്ചു. ചൊവ്വാഴ്ച തന്റെ ട്രൂത്ത് സോഷ്യൽ അക്കൗണ്ടിലൂടെയാണ് ട്രംപ് ഒമറിനെതിരെ രൂക്ഷവിമർശനം നടത്തിയത്.
ഇൽഹാൻ ഒമർ നേരത്തെ തന്റെ ആസ്തി മൂല്യം മൂന്ന് കോടി യുഎസ് ഡോളർ വരെയാണെന്ന് വെളിപ്പെടുത്തിയതായും പിന്നീട് അത് അക്കൗണ്ടിങ്ങിലെ പിഴവാണെന്നും യഥാർഥ ആസ്തി ഒരു ലക്ഷം ഡോളർ മാത്രമാണെന്നും വ്യക്തമാക്കിയതായുമുള്ള റിപ്പോർട്ടുകളെയാണ് ട്രംപ് ചോദ്യം ചെയ്തത്. ആദ്യം വെളിപ്പെടുത്തിയ തുക യഥാർഥമായിരുന്നോ എന്നും ഇത്രയും വലിയ സമ്പത്തിന്റെ ഉറവിടം വിശദീകരിക്കാൻ കഴിയാത്തതിനാലാണോ പിന്നീട് തിരുത്തിയതെന്നും ട്രംപ് സംശയം പ്രകടിപ്പിച്ചു.
‘‘കുറച്ചുകാലം മുമ്പ് ഇൽഹാൻ ഒമർ തന്റെ ആസ്തി മൂല്യം മൂന്ന് കോടി ഡോളർ വരെയാണെന്ന് റിപ്പോർട്ട് ചെയ്തത് എന്തുകൊണ്ടാണ്? പിന്നീട് ഉടൻതന്നെ ‘ഓ, എനിക്ക് തെറ്റുപറ്റി! യഥാർഥത്തിൽ അത് ഒരു ലക്ഷം ഡോളർ മാത്രമാണ്’ എന്ന് പറഞ്ഞത് എന്തിനാണ്? മിനസോട്ടയിലെ അവരുടെ തട്ടിപ്പ് പ്രവർത്തനങ്ങളിലൂടെ മോഷ്ടിച്ച പണത്തിന്റെ കണക്കാണോ ഉയർന്ന പ്രതിഫലം വാങ്ങുന്ന അവരുടെ അക്കൗണ്ടന്റ് യഥാർഥത്തിൽ രേഖപ്പെടുത്തിയത്?’’ ട്രംപ് ചോദിച്ചു.
‘‘അത്തരമൊരു കാര്യം സംഭവിക്കാൻ സാധ്യതയുണ്ടോ? അക്കൗണ്ടന്റ് ആദ്യം നൽകിയ മൂന്ന് കോടി ഡോളർ എന്ന കണക്ക് ശരിയായിരുന്നതാകാമോ? അത്രയും പണം എവിടെനിന്ന് ലഭിച്ചുവെന്ന് വിശദീകരിക്കാൻ കഴിയില്ലെന്ന് മനസ്സിലായതോടെ ആ കണക്ക് നിഷേധിക്കാൻ അവർ നിർബന്ധിതയായതാകുമോ? ആ തുക കണ്ടപ്പോൾ അവർ പരിഭ്രാന്തയായിട്ടുണ്ടാകണം!’’ ട്രംപ് കൂട്ടിച്ചേർത്തു.
‘‘അവരുടെ വീട് എവിടെനിന്ന് വന്നു? കാറുകൾ എവിടെനിന്ന് ലഭിച്ചു? വാഷിംഗ്ടണ്‍ ഡിസിയിലെ അവരുടെ മനോഹരമായ വസതിയുടെ കാര്യമോ?’’ ട്രംപ് ചോദിച്ചു. ‘‘കോൺഗ്രസ് അംഗങ്ങൾക്ക് ഇത്രയധികം പണം സമ്പാദിക്കാൻ കഴിയുമെന്ന് എനിക്കറിയില്ലായിരുന്നു. എന്നാൽ ലഭ്യമായ വിവരങ്ങളുടെയും എന്റെ വിശ്വാസത്തിന്റെയും അടിസ്ഥാനത്തിൽ അവരുടെ ഭർത്താവിന് കാര്യമായ വരുമാനമില്ലെന്നാണ് മനസ്സിലാക്കുന്നത്. അതിനാൽ ഈ പണം അദ്ദേഹത്തിൽ നിന്ന് ലഭിച്ചതാകാൻ സാധ്യതയില്ല,’’ ട്രംപ് പറഞ്ഞു.
ഇതിനു പിന്നാലെയാണ് സൊമാലിയയിൽനിന്നുള്ള കുടിയേറ്റക്കാരെക്കുറിച്ചും ട്രംപ് ആരോപണം ഉന്നയിച്ചത്. ‘‘സൊമാലിയയിൽനിന്ന് എത്ര പേരെയാണ് അവർ നിയമവിരുദ്ധമായി നമ്മുടെ രാജ്യത്തേക്ക് കൊണ്ടുവന്നത്?’’ എന്നായിരുന്നു ട്രംപിന്റെ ചോദ്യം. ‘‘അമേരിക്കയ്ക്ക് ഉത്തരങ്ങൾ വേണം. ഞങ്ങൾക്ക് അവ ഇപ്പോൾത്തന്നെ ലഭിക്കണം!’’ എന്ന വാക്കുകളോടെയാണ് ട്രംപ് തന്റെ കുറിപ്പ് അവസാനിപ്പിച്ചത്.
ന്യൂയോർക്ക് പോസ്റ്റിന്റെ റിപ്പോർട്ട് പ്രകാരം, ഇൽഹാൻ ഒമറിന്റെ ഭർത്താവ് ടിം മൈനെറ്റ് തന്റെ വെഞ്ച്വർ ക്യാപിറ്റൽ സ്ഥാപനമായ റോസ് ലേക്ക് ക്യാപിറ്റലിന്റെയും കാലിഫോർണിയ ആസ്ഥാനമായി പ്രവർത്തിച്ചിരുന്ന, ഇപ്പോൾ അടച്ചുപൂട്ടിയ ഇസ്റ്റ്ക്രൂ (eStCru) എന്ന വൈൻ ബിസിനസിന്റെയും സംയുക്ത മൂല്യം മൂന്ന് കോടി യുഎസ് ഡോളർ വരെയാണെന്ന് ഒമറിന്റെ 2024ലെ സാമ്പത്തിക വെളിപ്പെടുത്തൽ രേഖയിൽ രേഖപ്പെടുത്തിയിരുന്നു.
എന്നാൽ, 2025ലെ സാമ്പത്തിക വെളിപ്പെടുത്തൽ രേഖയിൽ മൈനെറ്റ് തന്റെ വെഞ്ച്വർ ക്യാപിറ്റൽ സ്ഥാപനത്തിൽനിന്ന് വരുമാനമൊന്നും ലഭിച്ചിട്ടില്ലെന്നാണ് വ്യക്തമാക്കിയതെന്ന് റിപ്പോർട്ട് പറയുന്നു. ഏപ്രിലിൽ പ്രവർത്തനം അവസാനിപ്പിച്ച വൈൻ ബിസിനസിൽനിന്ന് 200 മുതൽ 1,000 ഡോളർ വരെ മാത്രമാണ് വരുമാനം ലഭിച്ചതെന്നും രേഖപ്പെടുത്തിയിരുന്നു.
അതേസമയം, ഒക്ടോബർ 12ന് ഇൽഹാൻ ഒമറിന്റെ വീട്ടിൽ പരിശോധന നടത്തിയതായി യുഎസ് നീതിന്യായ വകുപ്പ് (DOJ) സ്ഥിരീകരിച്ചു. നിലവിൽ നടന്നുകൊണ്ടിരിക്കുന്ന ഫെഡറൽ ക്രിമിനൽ അന്വേഷണത്തിന്റെ ഭാഗമായാണ് പരിശോധന നടത്തിയതെന്ന് അധികൃതർ അറിയിച്ചു.
‘‘നടന്നുകൊണ്ടിരിക്കുന്ന ഫെഡറൽ ക്രിമിനൽ അന്വേഷണത്തിന്റെ ഭാഗമായി കോടതി അംഗീകരിച്ച പരിശോധനാ വാറന്റ് ഹോംലാൻഡ് സെക്യൂരിറ്റി ഇൻവെസ്റ്റിഗേഷൻസ് നടപ്പാക്കി,’’ നീതിന്യായ വകുപ്പ് വക്താവ് വ്യക്തമാക്കി. എന്നാൽ, അന്വേഷണം നേരിട്ട് ഇൽഹാൻ ഒമറുമായി ബന്ധപ്പെട്ടതാണെന്ന് പ്രസ്താവനയിൽ വ്യക്തമാക്കിയിട്ടില്ല. പരിശോധനയെക്കുറിച്ചുള്ള കൂടുതൽ വിവരങ്ങളും വകുപ്പ് പുറത്തുവിട്ടിട്ടില്ല.
സംഭവത്തിൽ പ്രതികരണവുമായി മിനസോട്ടയിൽനിന്നുള്ള ഡെമോക്രാറ്റിക് പ്രതിനിധിയായ ഇൽഹാൻ ഒമറും രംഗത്തെത്തി.
‘‘എനിക്ക് കുഴപ്പമൊന്നുമില്ല,’’ എന്നായിരുന്നു അവരുടെ ആദ്യ പ്രതികരണം. തുടർന്ന് എക്സിൽ പങ്കുവച്ച കുറിപ്പിൽ ട്രംപിനെതിരെ രൂക്ഷമായ ആരോപണങ്ങളാണ് ഒമർ ഉന്നയിച്ചത്.
‘‘ഒരു കാര്യം വ്യക്തമായിരിക്കട്ടെ. രാഷ്ട്രീയ എതിരാളികളെ ലക്ഷ്യമിടാനും ഫെഡറൽ നിയമനിർവഹണ സംവിധാനങ്ങളെ രാഷ്ട്രീയ ആയുധമാക്കാനുമുള്ള ശ്രമമാണിത്. കഴിഞ്ഞ പത്ത് വർഷമായി അടിസ്ഥാനരഹിതമായ നുണകളും അപകീർത്തിപ്രചാരണങ്ങളും ഉപയോഗിച്ച് ട്രംപ് എന്നെ ലക്ഷ്യമിടുകയാണ്. രാഷ്ട്രീയ ഭീഷണിപ്പെടുത്തലിന്റെ ഭാഗമായി അദ്ദേഹം നടത്തുന്ന നീക്കങ്ങളുടെ ഏറ്റവും പുതിയ ഘട്ടമാണിത്. എന്നെ നിശ്ശബ്ദയാക്കാൻ കഴിയില്ല,’’ ഒമർ വ്യക്തമാക്കി.
എന്നാൽ, തിങ്കളാഴ്ച ഉച്ചയ്ക്ക് മാധ്യമപ്രവർത്തകരോട് സംസാരിച്ച ട്രംപ്, ഇൽഹാൻ ഒമറിന്റെ വീട്ടിൽ നടത്തിയ പരിശോധനയുമായി തനിക്ക് യാതൊരു ബന്ധവുമില്ലെന്ന് വ്യക്തമാക്കി. ‘‘ആ പരിശോധനയുമായി എനിക്ക് ഒരു ബന്ധവുമില്ല,’’ എന്നായിരുന്നു ട്രംപിന്റെ പ്രതികരണം.
