പട്‌ന: ബിഹാർ രാഷ്ട്രീയത്തിൽ പുതിയ വിവാദങ്ങൾക്ക് വഴിയൊരുക്കി ജനതാദൾ യുണൈറ്റഡിന്റെ (ജെഡിയു) കടുത്ത അച്ചടക്ക നടപടി. മൊകാമ മണ്ഡലത്തിലെ എംഎൽഎയും ബിഹാർ രാഷ്ട്രീയത്തിലെ പ്രമുഖ നേതാവുമായ അനന്ത് സിംഗിനെയും ഭാര്യ നീലം ദേവിയെയും ആറ് വർഷത്തേക്ക് പാർട്ടിയിൽ നിന്ന് പുറത്താക്കിയതായി റിപ്പോർട്ട്. ഇരുവരുടെയും പ്രാഥമിക പാർട്ടി അംഗത്വവും അടിയന്തര പ്രാബല്യത്തോടെ റദ്ദാക്കി. അനന്ത് സിംഗിനെ നിയമസഭാംഗത്വത്തിൽ നിന്ന് അയോഗ്യനാക്കണമെന്ന് ആവശ്യപ്പെട്ട് നിയമസഭാ സ്പീക്കർ പ്രേം കുമാറിന് പാർട്ടി ശുപാർശ നൽകിയതായും റിപ്പോർട്ടുകളുണ്ട്.
ബിഹാറിലെ ലെജിസ്ലേറ്റീവ് കൗൺസിൽ തിരഞ്ഞെടുപ്പുമായി ബന്ധപ്പെട്ട് അനന്ത് സിംഗ് സ്വീകരിച്ച നിലപാടുകളാണ് കടുത്ത നടപടിക്ക് കാരണമായത്. പാർട്ടി നിർദേശങ്ങൾ നിരന്തരം ലംഘിച്ചതും മുതിർന്ന നേതാക്കൾക്കെതിരെ അപമാനകരമായ പരാമർശങ്ങൾ നടത്തിയതും ഔദ്യോഗിക സ്ഥാനാർത്ഥിക്കെതിരെ പരസ്യമായി പ്രവർത്തിച്ചതുമാണ് ജെഡിയു ചൂണ്ടിക്കാട്ടുന്ന പ്രധാന അച്ചടക്കലംഘനങ്ങൾ.
ഒക്ടോബർ 23ന് നടന്ന ലെജിസ്ലേറ്റീവ് കൗൺസിൽ തിരഞ്ഞെടുപ്പിൽ ജെഡിയു സ്ഥാനാർത്ഥി നീരജ് കുമാറിനെ പിന്തുണയ്ക്കുന്നതിന് പകരം ജൻ സൂരജ് പാർട്ടി സ്ഥാനാർത്ഥി അനുജ് സിംഗിനുവേണ്ടി അനന്ത് സിംഗ് പരസ്യമായി രംഗത്തെത്തിയിരുന്നു. സ്വന്തം പാർട്ടിയുടെ സ്ഥാനാർത്ഥിക്കെതിരായ ഈ നീക്കം ജെഡിയു നേതൃത്വത്തെ പ്രകോപിപ്പിച്ചു. വോട്ടെടുപ്പ് പൂർത്തിയായതിന് പിന്നാലെയാണ് പുറത്താക്കൽ നടപടിയിലേക്ക് നേതൃത്വം കടന്നത്.
അനന്ത് സിംഗിന്റെ അടുത്ത അനുയായിയായ ഛോട്ടു സിംഗിന്റെ അറസ്റ്റിനെച്ചൊല്ലിയും പാർട്ടി നേതൃത്വവുമായി കടുത്ത ഭിന്നത ഉടലെടുത്തിരുന്നു. അറസ്റ്റിന് പിന്നിൽ രാഷ്ട്രീയ ഇടപെടലുണ്ടെന്ന ആരോപണവുമായി രംഗത്തെത്തിയ അനന്ത് സിംഗ്, ജെഡിയു നേതൃത്വത്തെയും എംഎൽസി സ്ഥാനാർത്ഥി നീരജ് കുമാറിനെയും രൂക്ഷമായി വിമർശിച്ചു. നേരത്തെയും നീരജ് കുമാറിനെയും കേന്ദ്രമന്ത്രി ലല്ലൻ സിംഗിനെയും രാഷ്ട്രീയമായി എതിർത്തിട്ടുണ്ടെന്നും അന്നൊന്നും പാർട്ടി നടപടിയെടുത്തിരുന്നില്ലെന്നും അദ്ദേഹം പ്രതികരിച്ചു.
എന്നാൽ ഇത്തവണ അനന്ത് സിംഗിന്റെ പരസ്യമായ വിമതനീക്കങ്ങൾ അംഗീകരിക്കാനാവില്ലെന്ന നിലപാടിലാണ് ജെഡിയു നേതൃത്വം. പാർട്ടി അച്ചടക്കം ലംഘിക്കുന്നവർക്കെതിരെ വിട്ടുവീഴ്ചയില്ലാത്ത നടപടി സ്വീകരിക്കുമെന്ന സന്ദേശമാണ് പുറത്താക്കലിലൂടെ നേതൃത്വം നൽകുന്നത്.
മൊകാമ മേഖലയിൽ ശക്തമായ രാഷ്ട്രീയ സ്വാധീനമുള്ള നേതാവാണ് അനന്ത് സിംഗ്. അദ്ദേഹത്തെയും ഭാര്യയെയും ഒരേസമയം പുറത്താക്കിയ തീരുമാനം മണ്ഡലത്തിലെ രാഷ്ട്രീയ സമവാക്യങ്ങളിലും മാറ്റങ്ങൾക്ക് വഴിയൊരുക്കിയേക്കും. അതേസമയം, പാർട്ടിയിൽ നിന്നുള്ള പുറത്താക്കൽ മാത്രം എംഎൽഎ സ്ഥാനം നഷ്ടപ്പെടാൻ കാരണമാകില്ല. അയോഗ്യത സംബന്ധിച്ച് നിയമപരവും ഭരണഘടനാപരവുമായ നടപടികൾ ആവശ്യമാണ്.
അനന്ത് സിംഗിനെതിരായ ജെഡിയുവിന്റെ നടപടി ബിഹാറിലെ ഭരണകക്ഷി രാഷ്ട്രീയത്തിൽ പുതിയ ചർച്ചകൾക്ക് തുടക്കമിട്ടിരിക്കുകയാണ്. വരുംദിവസങ്ങളിൽ അനന്ത് സിങ് സ്വീകരിക്കുന്ന രാഷ്ട്രീയ നിലപാടും അയോഗ്യതാ ശുപാർശയിൽ സ്പീക്കർ കൈക്കൊള്ളുന്ന തീരുമാനവും നിർണായകമാകും.
