’19 വയസ്സുള്ളയാൾ എങ്ങനെ കുട്ടിയാകും? പണവും സ്വാധീനവും ഉപയോഗിച്ച് കുറ്റവാളിയെ രക്ഷിക്കാൻ ശ്രമം നടക്കുന്നതായി സംശയം’; മകളുടെ വിയോഗത്തിൽ തകർന്ന കുടുംബം ശക്തമായ നിയമനടപടി ആവശ്യപ്പെടുന്നു
കൽപറ്റ: നെടുമ്പാശ്ശേരിയിൽ മദ്യലഹരിയിൽ 19കാരൻ ഓടിച്ച ആഡംബര കാർ ഇടിച്ച് മൂന്ന് പേർ മരിച്ച സംഭവത്തിൽ കൊലക്കുറ്റം ചുമത്തണമെന്ന ആവശ്യവുമായി മരിച്ച ദേവികയുടെ കുടുംബം. മകളുടെ അപ്രതീക്ഷിത വിയോഗത്തിൽ തകർന്ന കുടുംബം, കുറ്റവാളിക്ക് നിയമത്തിന്റെ പഴുതുകളിലൂടെ രക്ഷപ്പെടാൻ അവസരമൊരുക്കരുതെന്നും പരമാവധി ശിക്ഷ ഉറപ്പാക്കണമെന്നും ആവശ്യപ്പെട്ടു. അപകടത്തിന് കാരണമായ കാർ ഓടിച്ച സുഹൈൽ സജീവിനെതിരെ നിലവിൽ ചുമത്തിയിരിക്കുന്ന മനഃപൂർവമല്ലാത്ത നരഹത്യാക്കുറ്റത്തിന് പകരം കൊലക്കുറ്റം ചുമത്തണമെന്നാണ് കുടുംബത്തിന്റെ ആവശ്യം.
സുഹൈലിനെ കുട്ടികളെ പാർപ്പിക്കുന്ന കേന്ദ്രത്തിലേക്ക് റിമാൻഡ് ചെയ്തെന്ന വിവരം അറിഞ്ഞതോടെ കുടുംബം കടുത്ത പ്രതിഷേധം രേഖപ്പെടുത്തി. 19 വയസ്സ് പൂർത്തിയായ ഒരാളെ എങ്ങനെയാണ് കുട്ടിയായി പരിഗണിക്കുന്നതെന്ന് ദേവികയുടെ പിതാവ് സന്തോഷ് ചോദിച്ചു. പ്രായപൂർത്തിയായ ഒരാൾ മദ്യപിച്ച് അമിതവേഗത്തിൽ വാഹനമോടിച്ച് മൂന്ന് ജീവനുകൾ നഷ്ടപ്പെടുത്തിയ സംഭവത്തെ ഗൗരവത്തോടെ കാണണമെന്നും അയാള്‍ക്ക് അർഹമായ ശിക്ഷ ലഭിക്കുന്നുണ്ടെന്ന് ഉറപ്പാക്കണമെന്നും അദ്ദേഹം ആവശ്യപ്പെട്ടു.
കുറ്റവാളിയായ മകനെ നിയമനടപടികളിൽനിന്ന് രക്ഷിക്കാൻ പിതാവ് ഇടപെടുന്നതായി സംശയിക്കുന്നുണ്ടെന്നും സന്തോഷ് ആരോപിച്ചു. അപകടത്തിന് പിന്നാലെ അയാള്‍ നടത്തിയതായി പറയുന്ന പ്രതികരണങ്ങളും കുടുംബത്തിന്റെ ആശങ്ക വർധിപ്പിച്ചിട്ടുണ്ട്. ‘എല്ലാം വാപ്പച്ചി നോക്കിക്കൊള്ളും’ എന്ന അയാളുടെ വാക്കുകളിൽ പണത്തിന്റെയും സ്വാധീനത്തിന്റെയും അഹങ്കാരവും നിയമത്തോടുള്ള ധിക്കാരവുമാണ് പ്രകടമാകുന്നതെന്ന് സന്തോഷ് പറഞ്ഞു. സാമ്പത്തികശേഷിയും സ്വാധീനവും ഉപയോഗിച്ച് കേസിന്റെ ഗതി മാറ്റാൻ ആരെയും അനുവദിക്കരുതെന്നും അദ്ദേഹം ആവശ്യപ്പെട്ടു.
അപകടസമയത്ത് സുഹൈൽ മദ്യത്തിന് പുറമേ മറ്റ് ലഹരിവസ്തുക്കളും ഉപയോഗിച്ചിരുന്നോ എന്ന കാര്യത്തിൽ വിശദമായ അന്വേഷണം നടത്തണമെന്നും കുടുംബം ആവശ്യപ്പെട്ടു. മൂന്ന് ബാറുകളിൽ കയറി മദ്യപിച്ച ശേഷമാണ് അയാള്‍ വാഹനമോടിച്ചതെന്ന് മാധ്യമങ്ങളിലൂടെയാണ് അറിഞ്ഞതെന്ന് സന്തോഷ് വ്യക്തമാക്കി. കാർ അതിവേഗത്തിലായിരുന്നുവെന്ന് പ്രദേശവാസികൾ പറഞ്ഞതായും അദ്ദേഹം ചൂണ്ടിക്കാട്ടി. മദ്യപിച്ചശേഷം വാഹനമോടിക്കുന്നതിന്റെ അപകടസാധ്യത വ്യക്തമായി അറിയാവുന്ന ഒരാൾ നടത്തിയ പ്രവൃത്തിയെ കേവലം അശ്രദ്ധയായി മാത്രം കാണാനാകില്ലെന്നാണ് കുടുംബത്തിന്റെ നിലപാട്.
അപകടത്തിൽപ്പെട്ട ആഡംബര കാർ സുഹൈലിന് അമ്മ പിറന്നാൾ സമ്മാനമായി നൽകിയതാണെന്ന് അറിഞ്ഞതായും സന്തോഷ് പറഞ്ഞു. വാഹനത്തിന്റെ വിലയോ അയാളുടെ കുടുംബത്തിന്റെ സാമ്പത്തികശേഷിയോ അന്വേഷണത്തെയും നിയമനടപടികളെയും സ്വാധീനിക്കരുതെന്നും മൂന്ന് ജീവനുകൾ നഷ്ടപ്പെട്ട സംഭവത്തിൽ കുറ്റക്കാർക്ക് മാതൃകാപരമായ ശിക്ഷ ലഭിക്കണമെന്നും കുടുംബം ആവശ്യപ്പെട്ടു.
സാമ്പത്തികമായി ഏറെ ബുദ്ധിമുട്ടുകൾ നേരിട്ടാണ് ദേവികയെ പഠിപ്പിച്ചതെന്ന് പിതാവ് സന്തോഷ് പറഞ്ഞു. സ്വന്തം സ്ഥലം വിറ്റും വായ്പയെടുത്തുമാണ് മകളുടെ വിദ്യാഭ്യാസത്തിനാവശ്യമായ പണം കണ്ടെത്തിയത്. കുടുംബത്തിന്റെ പ്രയാസങ്ങൾ മനസ്സിലാക്കി പഠനത്തിൽ മുന്നേറിയ ദേവിക ബി.ബി.എയും ഏവിയേഷൻ കോഴ്സും മികച്ച നിലയിലാണ് പൂർത്തിയാക്കിയത്. പഠനശേഷം മികച്ച ജോലി കണ്ടെത്തി കുടുംബത്തിന് താങ്ങാകണമെന്ന ആഗ്രഹത്തിലായിരുന്നു ദേവിക.
മൂന്നോ നാലോ മാസത്തിനുള്ളിൽ ഗൾഫിലേക്ക് പോകാനാകുമെന്ന പ്രതീക്ഷയിലായിരുന്നു മകളെന്നും അതിനായുള്ള ശ്രമങ്ങൾ തുടരുന്നതിനിടെയാണ് ദുരന്തമുണ്ടായതെന്നും സന്തോഷ് പറഞ്ഞു. വിദേശത്ത് ജോലി നേടി കുടുംബത്തിന്റെ സാമ്പത്തികബാധ്യതകൾ കുറയ്ക്കാനും മാതാപിതാക്കൾക്ക് ആശ്വാസമാകാനും ദേവിക ആഗ്രഹിച്ചിരുന്നു. എന്നാൽ ഒരു നിമിഷത്തെ ദുരന്തം ആ പ്രതീക്ഷകളെല്ലാം ഇല്ലാതാക്കി.
മകളുടെ വിദ്യാഭ്യാസത്തിനായി നടത്തിയ ത്യാഗങ്ങളും അവളുടെ ഭാവിയെക്കുറിച്ച് കണ്ട സ്വപ്നങ്ങളുമെല്ലാം ഇന്ന് വേദനിപ്പിക്കുന്ന ഓർമകളായി മാറിയിരിക്കുകയാണ്. ദേവികയുടെ മരണത്തോടെ നഷ്ടമായത് ഒരു മകളെ മാത്രമല്ല, കുടുംബത്തിന്റെ ഭാവിയെക്കുറിച്ചുള്ള മുഴുവൻ പ്രതീക്ഷകളുമാണെന്ന് സന്തോഷ് പറഞ്ഞു. തങ്ങൾ അനുഭവിക്കുന്ന വേദന മറ്റൊരു കുടുംബത്തിനും ഉണ്ടാകരുതെന്നും അതിനായി കുറ്റക്കാർക്കെതിരെ ശക്തമായ നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.
പോലീസിന്റെ ഭാഗത്തുനിന്ന് ഇതുവരെ നല്ല സമീപനമാണ് ഉണ്ടായതെന്നും അന്വേഷണത്തിൽ വിശ്വാസമുണ്ടെന്നും സന്തോഷ് വ്യക്തമാക്കി. കേസിൽ നീതി ഉറപ്പാക്കാൻ സംസ്ഥാന സർക്കാർ കുടുംബത്തിനൊപ്പം നിൽക്കുമെന്നാണ് പ്രതീക്ഷയെന്നും അദ്ദേഹം പറഞ്ഞു.
കുറ്റവാളിക്കെതിരെ കൂടുതൽ ഗുരുതരമായ വകുപ്പുകൾ ചുമത്തി പരമാവധി ശിക്ഷ ഉറപ്പാക്കണമെന്ന് ദേവികയുടെ അമ്മയുടെ സഹോദരൻ സന്ദീപും ആവശ്യപ്പെട്ടു. മൂന്ന് പേരുടെ മരണത്തിനിടയാക്കിയ സംഭവത്തിൽ അയാള്‍ക്ക് നിയമപരമായ ആനുകൂല്യങ്ങൾ ലഭിച്ച് ശിക്ഷയിൽനിന്ന് രക്ഷപ്പെടുന്ന സാഹചര്യം ഉണ്ടാകരുതെന്നും അദ്ദേഹം പറഞ്ഞു.
കുടുംബത്തിന്റെ പ്രതീക്ഷകളെല്ലാം ദേവികയെ ചുറ്റിപ്പറ്റിയായിരുന്നു. ഇളയ സഹോദരൻ ദേവാനന്ദിന് പ്രായം കുറവാണ്. പഠനം പൂർത്തിയാക്കി ജോലിയിൽ പ്രവേശിക്കുന്നതോടെ കുടുംബത്തിന്റെ ഉത്തരവാദിത്വങ്ങൾ ഏറ്റെടുക്കാൻ ദേവികയ്ക്ക് കഴിയുമെന്ന വിശ്വാസത്തിലായിരുന്നു എല്ലാവരും. ആ പ്രതീക്ഷകളാണ് അപകടത്തോടെ ഇല്ലാതായതെന്ന് സന്ദീപ് പറഞ്ഞു.
കേസിൽ നീതി ലഭിക്കുന്നതുവരെ നിയമപോരാട്ടം തുടരുമെന്നും ആവശ്യമായ എല്ലാ നടപടികളും സ്വീകരിക്കുമെന്നും അദ്ദേഹം വ്യക്തമാക്കി. സാമ്പത്തികശേഷിയില്ലെന്ന കാരണത്താൽ നീതി നിഷേധിക്കപ്പെടാൻ പാടില്ലെന്നും നിയമത്തിന് മുന്നിൽ എല്ലാവരും തുല്യരാണെന്ന് ഉറപ്പാക്കണമെന്നും കുടുംബം ആവശ്യപ്പെട്ടു.
ദേവികയുടെ അപ്രതീക്ഷിത മരണം ബന്ധുക്കളെയും നാട്ടുകാരെയും ദുഃഖത്തിലാഴ്ത്തി. അപകടവിവരം അറിഞ്ഞതുമുതൽ കുടുംബത്തെ ആശ്വസിപ്പിക്കാൻ നിരവധി പേരാണ് വീട്ടിലെത്തിയത്. മകളുടെ വേർപാട് ഉൾക്കൊള്ളാനാകാതെ മാതാപിതാക്കളും ബന്ധുക്കളും കണ്ണീരോടെ നിന്ന കാഴ്ചയാണ് സംസ്കാരച്ചടങ്ങുകൾക്കിടെ ഉണ്ടായത്.
ഞായറാഴ്ച രാത്രി പത്തരയോടെ തെക്കുംതറയിലെ തറവാടായ പുതിയപുരയിലാണ് ദേവികയുടെ സംസ്കാരച്ചടങ്ങുകൾ നടന്നത്. മൂന്ന് വർഷം മുമ്പ് കുടുംബം കൽപറ്റ മടക്കിമലയിലേക്ക് താമസം മാറിയിരുന്നെങ്കിലും അമ്മ സരിതയുടെ തെക്കുംതറയിലെ തറവാട്ടുവീട്ടിലാണ് അന്ത്യകർമങ്ങൾ നടത്തിയത്. ബന്ധുക്കളും നാട്ടുകാരുമടക്കം നിരവധി പേർ ദേവികയ്ക്ക് അന്ത്യാഞ്ജലി അർപ്പിക്കാനെത്തി.
പഠനം പൂർത്തിയാക്കി പുതിയൊരു ജീവിതത്തിലേക്ക് കടക്കാൻ ഒരുങ്ങിയിരുന്ന ദേവികയുടെ മരണം കുടുംബത്തിന് നികത്താനാകാത്ത നഷ്ടമായി. മകളുടെ ഓർമകൾ മാത്രം ബാക്കിയാകുമ്പോഴും അപകടത്തിന് ഉത്തരവാദികളായവർ നിയമത്തിന് മുന്നിൽ ശിക്ഷിക്കപ്പെടണമെന്ന ആവശ്യത്തിൽ ഉറച്ചുനിൽക്കുകയാണ് കുടുംബം.
‘ഞങ്ങളുടെ മകളെ ഇനി തിരികെ കിട്ടില്ല. പക്ഷേ, മറ്റൊരു കുടുംബത്തിനും ഇത്തരമൊരു ദുരന്തം സംഭവിക്കാതിരിക്കാനുള്ള നടപടിയെങ്കിലും ഉണ്ടാകണം’ എന്ന നിലപാടിലാണ് ദേവികയുടെ കുടുംബം. മൂന്ന് ജീവനുകൾ നഷ്ടപ്പെട്ട അപകടത്തിൽ കുറ്റക്കാർക്ക് അർഹമായ ശിക്ഷ ലഭിക്കുമെന്ന പ്രതീക്ഷയോടെ നീതിക്കായുള്ള പോരാട്ടം തുടരാനാണ് ബന്ധുക്കളുടെ തീരുമാനം.
