ന്യൂഡൽഹി: പ്രധാനമന്ത്രിയുടെ ഔദ്യോഗിക വസതിക്ക് സമീപമുള്ള ചരിത്രപ്രസിദ്ധമായ റേസ് കോഴ്‌സ് പള്ളി പൊളിച്ചുനീക്കാനുള്ള നീക്കത്തിന് താൽക്കാലിക വിരാമം. ഡൽഹി വഖഫ് ബോർഡ് സമർപ്പിച്ച നിവേദനത്തിൽ അന്തിമ തീരുമാനമെടുക്കുന്നതുവരെ പള്ളിക്കെതിരെ പൊളിക്കൽ നടപടികൾ സ്വീകരിക്കില്ലെന്ന് കേന്ദ്ര സർക്കാരിന്റെ ലാൻഡ് ആൻഡ് ഡെവലപ്‌മെന്റ് ഓഫീസ് (എൽ ആൻഡ് ഡിഒ) ഡൽഹി ഹൈക്കോടതിയെ അറിയിച്ചു.
ജസ്റ്റിസ് അനീഷ് ദയാൽ അധ്യക്ഷനായ ബെഞ്ചിന് മുമ്പാകെ കേന്ദ്ര സർക്കാരിനുവേണ്ടി ഹാജരായ അഭിഭാഷകൻ ആശിഷ് ദീക്ഷിതാണ് ഇക്കാര്യം വ്യക്തമാക്കിയത്. വഖഫ് ബോർഡിന്റെ നിവേദനത്തിൽ നാലാഴ്ചയ്ക്കകം ഔദ്യോഗിക തീരുമാനമെടുക്കുമെന്നും കേന്ദ്രം കോടതിയെ അറിയിച്ചു. തുടർന്ന് കേസിന്റെ തുടർവാദം ഡിസംബർ 16ലേക്ക് മാറ്റി.
പള്ളി പൊളിച്ചുനീക്കാനുള്ള സാധ്യതയിൽനിന്ന് സംരക്ഷണം നൽകണമെന്നും വിശ്വാസികൾക്ക് തടസ്സങ്ങളില്ലാതെ ആരാധന നടത്താനുള്ള സാഹചര്യം ഉറപ്പാക്കണമെന്നും ആവശ്യപ്പെട്ട് സയ്യിദ് അഹമ്മദ് സൗദ് സമർപ്പിച്ച ഹർജി പരിഗണിക്കവെയാണ് കേന്ദ്ര സർക്കാരിന്റെ നിർണായക ഉറപ്പ്.
എന്നാൽ, ഹർജിക്കാരന് കോടതിയെ സമീപിക്കാനുള്ള നിയമപരമായ അവകാശമുണ്ടോയെന്ന കാര്യത്തിൽ കേന്ദ്ര സർക്കാർ എതിർപ്പുന്നയിച്ചു. വ്യക്തിഗത ആരാധകർ ഇത്തരം വിഷയങ്ങളിൽ കോടതിയെ സമീപിക്കുന്നത് സമാന സ്വഭാവത്തിലുള്ള നിരവധി ഹർജികൾക്ക് വഴിയൊരുക്കുമെന്നായിരുന്നു കേന്ദ്രത്തിന്റെ വാദം.
അതേസമയം, ഹർജിക്കാരനുവേണ്ടി ഹാജരായ അഭിഭാഷകൻ എം. സുഫിയാൻ സിദ്ദിഖി ഈ വാദത്തെ ശക്തമായി എതിർത്തു. ഭരണഘടന ഉറപ്പുനൽകുന്ന മതസ്വാതന്ത്ര്യത്തിനുള്ള മൗലികാവകാശത്തിന്റെ അടിസ്ഥാനത്തിൽ കോടതിയെ സമീപിക്കാൻ ഹർജിക്കാരന് പൂർണ അവകാശമുണ്ടെന്ന് അദ്ദേഹം ചൂണ്ടിക്കാട്ടി.
പള്ളിയിലേക്കുള്ള പ്രവേശന റോഡുകളിൽ തടസ്സങ്ങൾ സൃഷ്ടിക്കുന്നതായും ഹർജിയിൽ ആരോപണമുണ്ട്. കേന്ദ്ര സർക്കാരിന്റെ ഉറപ്പോടെ പള്ളിക്കെതിരായ പൊളിക്കൽ ഭീഷണിക്ക് താൽക്കാലിക ആശ്വാസമായിരിക്കുകയാണ്. വഖഫ് ബോർഡിന്റെ നിവേദനത്തിൽ കേന്ദ്രം സ്വീകരിക്കുന്ന നിലപാടും ഡിസംബർ 16ന് നടക്കുന്ന തുടർവാദവും കേസിൽ നിർണായകമാകും.
