തിരുവനന്തപുരം: ചേരാനല്ലൂർ വാഹനാപകടക്കേസിന്റെ അന്വേഷണത്തിൽ പൊലീസിന്റെ ഭാഗത്തുനിന്നുണ്ടായ ഗുരുതര വീഴ്ചകളുടെ പശ്ചാത്തലത്തിൽ കൊച്ചി സിറ്റി പൊലീസ് നേതൃത്വത്തിൽ വൻ അഴിച്ചുപണി നടത്തി സംസ്ഥാന സർക്കാർ. കൊച്ചി സിറ്റി പൊലീസ് കമ്മീഷണറായിരുന്ന കാളിരാജ് മഹേഷിനെ തൽസ്ഥാനത്തുനിന്ന് മാറ്റി. പകരം മുതിർന്ന ഐപിഎസ് ഉദ്യോഗസ്ഥ ആർ. നിശാന്തിനിയെ പുതിയ കൊച്ചി സിറ്റി പൊലീസ് കമ്മീഷണറായി നിയമിച്ചു.
പൊലീസ് തലപ്പത്തെ പുനഃസംഘടനയുടെ ഭാഗമായി പി. പ്രകാശിനെ ദക്ഷിണമേഖലാ ഐജിയായും നിയമിക്കാൻ തീരുമാനിച്ചിട്ടുണ്ട്. ഇതുസംബന്ധിച്ച ഔദ്യോഗിക ഉത്തരവ് പുറത്തിറങ്ങിയതായാണ് വിവരം. ചേരാനല്ലൂർ അപകടക്കേസിൽ പൊലീസിന്റെ ഇടപെടലിനെതിരെ വ്യാപക വിമർശനം ഉയർന്ന സാഹചര്യത്തിലാണ് ഉന്നത ഉദ്യോഗസ്ഥർക്കെതിരെയും നടപടിയിലേക്ക് സർക്കാർ കടന്നിരിക്കുന്നത്.
അഡീഷണൽ ജഡ്ജിയുടെ പതിനേഴുകാരനായ മകൻ ഓടിച്ചിരുന്ന ബെൻസ് കാർ ഇടിച്ച് 55 വയസ്സുകാരൻ മരിച്ച സംഭവമാണ് വിവാദങ്ങൾക്ക് വഴിവെച്ചത്. അപകടത്തിനുശേഷം കേസ് കൈകാര്യം ചെയ്തതിലും തെളിവുകൾ ശേഖരിക്കുന്നതിലും നിയമനടപടികൾ സ്വീകരിക്കുന്നതിലും പൊലീസിന്റെ ഭാഗത്തുനിന്ന് ഗുരുതരമായ വീഴ്ചകളുണ്ടായെന്ന ആരോപണം ശക്തമായിരുന്നു. പ്രതിയുടെ കുടുംബപശ്ചാത്തലം അന്വേഷണ നടപടികളെ സ്വാധീനിച്ചോയെന്ന സംശയവും ഉയർന്നിരുന്നു.
അപകടക്കേസിലെ അന്വേഷണത്തിലെ വീഴ്ചകൾ പുറത്തുവന്നതോടെ ചേരാനല്ലൂർ പൊലീസ് സ്റ്റേഷനിലെ നാല് ഉദ്യോഗസ്ഥരെ കഴിഞ്ഞ ദിവസം സസ്‌പെൻഡ് ചെയ്തിരുന്നു. സർക്കിൾ ഇൻസ്‌പെക്ടറും സ്റ്റേഷൻ ഹൗസ് ഓഫീസറും ഉൾപ്പെടെയുള്ള ഉദ്യോഗസ്ഥർക്കെതിരെയായിരുന്നു നടപടി. കേസിന്റെ പ്രാഥമിക അന്വേഷണത്തിലും തുടർനടപടികളിലും ആവശ്യമായ ജാഗ്രത പുലർത്തിയില്ലെന്ന കണ്ടെത്തലിന്റെ അടിസ്ഥാനത്തിലായിരുന്നു സസ്പെൻഷൻ.
നാല് പൊലീസുകാരെ സസ്‌പെൻഡ് ചെയ്തതിന് പിന്നാലെ സിറ്റി പൊലീസ് കമ്മീഷണറെയും മാറ്റിയതോടെ സംഭവത്തിൽ സർക്കാർ കൂടുതൽ കടുത്ത നിലപാട് സ്വീകരിക്കുന്നുവെന്ന സൂചനയാണ് ലഭിക്കുന്നത്. ഒരു വാഹനാപകടക്കേസിന്റെ അന്വേഷണത്തിൽ ഉണ്ടായ വീഴ്ചകൾ പൊലീസ് സേനയുടെ ഉന്നതതല പുനഃസംഘടനയിലേക്ക് നയിച്ചുവെന്നതും ശ്രദ്ധേയമാണ്.
സസ്പെൻഷൻ നടപടി നാല് ഉദ്യോഗസ്ഥരിൽ മാത്രം ഒതുങ്ങില്ലെന്ന് ആഭ്യന്തര വകുപ്പ് മന്ത്രി രമേശ് ചെന്നിത്തല നിയമസഭയിൽ വ്യക്തമാക്കിയിരുന്നു. ഇതിനു പിന്നാലെയാണ് കമ്മിഷണറെ മാറ്റാനുള്ള തീരുമാനം വരുന്നത്. ക്രമസമാധാന ചുമതലയുള്ള എഡിജിപി നൽകിയ റിപ്പോർട്ടിൻ്റെ അടിസ്ഥാനത്തിലാണ് നടപടി. ഗുരുതരമായ പ്രശ്നങ്ങൾ ഉണ്ടായിട്ടും മേലധികാരികളെ അറിയിക്കുന്നതിൽ കമ്മിഷണർ വലിയ കാലതാമസം വരുത്തിയെന്ന് എഡിജിപിയുടെ റിപ്പോർട്ടിൽ പറയുന്നു. കാര്യങ്ങൾ കൈവിട്ടുപോയതിന് ശേഷമാണ് കമ്മിഷണർ മുകളിലോട്ടുള്ള ഉദ്യോഗസ്ഥരെ വിവരം അറിയിച്ചത്. തുടർന്ന് എഡിജിപിക്ക് തന്നെ മരണവീട്ടിലേക്ക് പോകേണ്ട സാഹചര്യമുണ്ടായി. സമരം നടത്തുന്ന നാട്ടുകാരോടും ബന്ധുക്കളോടും സർക്കാരിൻ്റെ ഭാഗത്തുനിന്ന് നടപടിയുണ്ടാകുമെന്ന് ഉന്നത ഉദ്യോഗസ്ഥന് നേരിട്ട് പോയി ഉറപ്പ് നൽകേണ്ടി വന്നു.
പൊലീസിനെ തള്ളിപ്പറയേണ്ട സാഹചര്യം സർക്കാരിനും ആഭ്യന്തര മന്ത്രിക്കും ഉണ്ടായതോടെയാണ് കടുത്ത നടപടികളിലേക്ക് നീങ്ങിയത്. കാളിരാജ് മഹേഷിനെ കൊച്ചി സിറ്റി പൊലീസ് കമ്മിഷണർ സ്ഥാനത്തുനിന്നും മാറ്റാനുള്ള ചർച്ചകൾ നേരത്തെ തന്നെ ആഭ്യന്തര വകുപ്പിൽ നടന്നിരുന്നു. എന്നാൽ ചില ആഭ്യന്തര വകുപ്പിലെ ഉദ്യോഗസ്ഥരും പുറത്തുനിന്നുള്ളവരും അദ്ദേഹത്തെ അവിടെത്തന്നെ നിലനിർത്താൻ സമ്മർദം ചെലുത്തിയിരുന്നു. ഈ സമ്മർദങ്ങളെല്ലാം മറികടന്നാണ് മുഖ്യമന്ത്രി വി.ഡി. സതീശനും ആഭ്യന്തര മന്ത്രി രമേശ് ചെന്നിത്തലയും ചേർന്ന് കമ്മിഷണറെ മാറ്റാൻ തീരുമാനിച്ചത്. മുഖ്യമന്ത്രി ഫയലിൽ ഒപ്പിട്ടാലുടൻ ഉത്തരവ് പുറത്തിറങ്ങും.
ചേരാനല്ലൂരിൽ നടന്ന വാഹനാപകടം കേരള മനഃസാക്ഷിയെ ഒന്നാകെ ഞെട്ടിച്ച സംഭവമായിരുന്നു. പ്രായപൂർത്തിയാകാത്ത കുട്ടി വാഹനം ഓടിച്ച് ഒരാളുടെ ജീവനെടുത്തപ്പോൾ, നിയമം നടപ്പിലാക്കേണ്ട പൊലീസ് ഉദ്യോഗസ്ഥർ തന്നെ പ്രതികളെ സംരക്ഷിക്കാൻ ശ്രമിച്ചത് വലിയ പ്രതിഷേധങ്ങൾക്ക് കാരണമായി. കേവലം താഴെത്തട്ടിലുള്ള ഉദ്യോഗസ്ഥർ മാത്രമല്ല, ഉന്നത ഉദ്യോഗസ്ഥർക്കും ഇതിൽ പങ്കുണ്ടെന്ന ആരോപണം ശക്തമായിരുന്നു.
ഈ സാഹചര്യത്തിലാണ് സർക്കാരിൻ്റെ അടിയന്തര ഇടപെടൽ ഉണ്ടായത്. കാളിരാജ് മഹേഷിന് പകരം ദക്ഷിണമേഖല ഐജിയായ ആർ. നിശാന്തിനിയെയാണ് പുതിയ കൊച്ചി കമ്മിഷണറായി നിയമിക്കുന്നത്. കാളിരാജ് മഹേഷിന് ഏത് നിയമനം നൽകുമെന്ന കാര്യത്തിൽ തീരുമാനമായിട്ടില്ല. നിലവിൽ എസ്സിആർബിയുടെ ഐജിയായ സൈബർ ഡിവിഷൻ്റെ ചുമതലയുള്ള പി. പ്രകാശ് ദക്ഷിണമേഖല ഐജിയായി എത്തും.
അപകടത്തിൽ മരിച്ചയാളുടെ കുടുംബം നീതിയുക്തവും സുതാര്യവുമായ അന്വേഷണം ആവശ്യപ്പെട്ട് രംഗത്തെത്തിയിരുന്നു. പൊലീസിന്റെ ആദ്യഘട്ട നടപടികളിൽ വീഴ്ചയുണ്ടായെന്ന ആരോപണങ്ങൾ ശക്തമായതോടെയാണ് കേസ് കൂടുതൽ വിവാദമായത്. പുതിയ പൊലീസ് നേതൃത്വത്തിന് കീഴിൽ അന്വേഷണ നടപടികൾ കൂടുതൽ കാര്യക്ഷമമാകുമെന്ന പ്രതീക്ഷയിലാണ് തുടർനടപടികൾ വിലയിരുത്തപ്പെടുന്നത്.
