സമൂഹമാധ്യമ പോസ്റ്റിലും അതൃപ്തി; പോലീസിനെതിരെ ഹൈക്കോടതിയെ സമീപിക്കാൻ എസ്.എഫ്.ഐ, മന്ത്രിക്കും ഷാഫി പറമ്പിൽ എം.പിക്കുമെതിരെ പരാതിക്ക് നീക്കം
തിരുവനന്തപുരം: തിരുവനന്തപുരം യൂണിവേഴ്‌സിറ്റി ഹോസ്റ്റലുമായി ബന്ധപ്പെട്ട സംഘർഷവും തുടർന്നുണ്ടായ പോലീസ് നടപടികളും വിവാദമായിരിക്കെ കന്റോൺമെന്റ് എസ്.എച്ച്.ഒ സതീഷിനെ സിറ്റി പോലീസ് കമ്മീഷണർ നേരിട്ട് വിളിപ്പിച്ച് താക്കീത് ചെയ്തതായി വിവരം. സംഭവവുമായി ബന്ധപ്പെട്ട് എസ്.എച്ച്.ഒ സമൂഹമാധ്യമങ്ങളിൽ പോസ്റ്റ് പങ്കുവച്ചതിലടക്കം കമ്മീഷണർ കടുത്ത അതൃപ്തി രേഖപ്പെടുത്തിയെന്നാണ് റിപ്പോർട്ട്.
യൂണിവേഴ്‌സിറ്റി ഹോസ്റ്റൽ സംഘർഷത്തിനു പിന്നാലെ പോലീസും എസ്.എഫ്.ഐയും തമ്മിലുള്ള ഭിന്നത രൂക്ഷമായ സാഹചര്യത്തിലാണ് ഉന്നത പോലീസ് ഉദ്യോഗസ്ഥരുടെ ഇടപെടൽ. ഔദ്യോഗിക ചുമതല വഹിക്കുന്ന ഉദ്യോഗസ്ഥർ വിവാദ വിഷയങ്ങളിൽ സമൂഹമാധ്യമങ്ങളിലൂടെ പ്രതികരിക്കുന്നതിലും കമ്മീഷണർ അതൃപ്തി അറിയിച്ചതായാണ് സൂചന.
ഇതിനിടെ എസ്.എഫ്.ഐ ജില്ലാ സെക്രട്ടറിയെ ഭീഷണിപ്പെടുത്തിയെന്ന ആരോപണം നേരിടുന്ന എസ്.ഐ ഗോകുലിനെതിരെയും വകുപ്പുതല നടപടി ഉണ്ടായേക്കുമെന്നാണ് വിവരം. സംഭവവുമായി ബന്ധപ്പെട്ട പോലീസ് ഉദ്യോഗസ്ഥരുടെ ഇടപെടലുകളും പെരുമാറ്റവും ഉന്നതതലത്തിൽ പരിശോധിക്കപ്പെടുന്ന സാഹചര്യത്തിലാണ് നടപടി സംബന്ധിച്ച സാധ്യത ഉയർന്നിരിക്കുന്നത്.
അതേസമയം, യൂണിവേഴ്‌സിറ്റി ഹോസ്റ്റൽ സംഘർഷത്തിലും തുടർന്നുള്ള പോലീസ് നടപടികളിലും നിയമപോരാട്ടം ശക്തമാക്കാനാണ് എസ്.എഫ്.ഐയുടെ തീരുമാനം. സംഘർഷത്തിന് നേതൃത്വം നൽകിയെന്നും സ്ഥിതിഗതികൾ ശാന്തമാക്കാൻ ആവശ്യമായ ഇടപെടൽ നടത്തിയില്ലെന്നും ആരോപിച്ച് മന്ത്രി ഒ.ജെ. ജനീഷ്, ഷാഫി പറമ്പിൽ എം.പി എന്നിവർക്കെതിരെ കേസെടുക്കണമെന്നാവശ്യപ്പെട്ട് സംഘർഷത്തിൽ പരിക്കേറ്റ വേണു എന്ന വിദ്യാർത്ഥി പരാതി നൽകുമെന്നാണ് വിവരം.
തലസ്ഥാനത്ത് എസ്.എഫ്.ഐ പ്രവർത്തകർക്കെതിരെ പോലീസ് സ്വീകരിക്കുന്ന നടപടികളെ ചോദ്യം ചെയ്ത് ഹൈക്കോടതിയിൽ പൊതുതാൽപര്യ ഹർജി സമർപ്പിക്കാനും സംഘടന തീരുമാനിച്ചിട്ടുണ്ട്. എസ്.എഫ്.ഐ നേതാക്കളെയും പ്രവർത്തകരെയും പോലീസ് തിരഞ്ഞുപിടിച്ച് മർദ്ദിക്കുകയാണെന്നാണ് സംഘടനയുടെ പ്രധാന ആരോപണം.
തിരുവനന്തപുരത്തെ നിലവിലെ സാഹചര്യം സാധാരണ നിലയിലാക്കാനും ക്രമസമാധാനം ഉറപ്പാക്കാനും കോടതി ഇടപെടണമെന്ന ആവശ്യവും ഹർജിയിൽ ഉന്നയിക്കും. കന്റോൺമെന്റ് സി.ഐക്കും എസ്.ഐക്കുമെതിരെ നടപടി സ്വീകരിക്കണമെന്ന ആവശ്യവും ഹർജിയുടെ ഭാഗമാക്കുമെന്നാണ് വിവരം.
സംഘർഷവുമായി ബന്ധപ്പെട്ട് ആരോപണവിധേയരായ പോലീസുകാരുടെ വീടുകളിലേക്ക് പ്രതിഷേധ പരിപാടികൾ നടത്തുമെന്ന് എസ്.എഫ്.ഐ നേരത്തെ പ്രഖ്യാപിച്ചിരുന്നു. എന്നാൽ നിലവിലെ സാഹചര്യത്തിൽ ഇത്തരം പ്രതിഷേധങ്ങൾ താത്കാലികമായി അവസാനിപ്പിക്കാൻ സംഘടന തീരുമാനിച്ചിട്ടുണ്ട്.
യൂണിവേഴ്‌സിറ്റി ഹോസ്റ്റൽ സംഘർഷത്തെ തുടർന്ന് ആരംഭിച്ച വിവാദം ഇപ്പോൾ പോലീസ് ഉദ്യോഗസ്ഥർക്കെതിരായ വകുപ്പുതല നടപടികളിലേക്കും ഹൈക്കോടതിയിലെ നിയമപോരാട്ടത്തിലേക്കും നീങ്ങുകയാണ്. എസ്.എച്ച്.ഒയ്ക്ക് കമ്മീഷണർ താക്കീത് നൽകിയെന്ന വിവരവും എസ്.ഐക്കെതിരെ നടപടി ഉണ്ടായേക്കുമെന്ന സൂചനയും പുറത്തുവന്നതോടെ വിഷയം കൂടുതൽ ഗൗരവമുള്ള തലത്തിലേക്ക് മാറിയിരിക്കുകയാണ്.
