കൊല്ലം: സോളാർ തട്ടിപ്പ് കേസുമായി ബന്ധപ്പെട്ട് മുൻ മുഖ്യമന്ത്രി ഉമ്മൻചാണ്ടിക്കെതിരെ ഉയർന്ന ആരോപണങ്ങൾക്ക് പിന്നിൽ മന്ത്രി കെ.ബി. ഗണേശ് കുമാറിന്റെ ഗൂഢാലോചനയുണ്ടെന്ന് മുൻ മന്ത്രി കെ. ബാബു കോടതിയിൽ മൊഴി നൽകി. ഉമ്മൻചാണ്ടിയെ രാഷ്ട്രീയമായി അപകീർത്തിപ്പെടുത്തുകയെന്ന ലക്ഷ്യത്തോടെയാണ് വ്യാജ ആരോപണങ്ങൾ ഉന്നയിച്ചതെന്നാണ് കെ. ബാബുവിന്റെ ആരോപണം. കൊട്ടാരക്കര മജിസ്ട്രേറ്റ് കോടതിയിലാണ് അദ്ദേഹം ഇക്കാര്യം വ്യക്തമാക്കിയത്. അഡ്വ. സുധീർ ജേക്കബ് വാദിയായി സമർപ്പിച്ച കേസിലാണ് നിർണായക മൊഴി നൽകിയത്.
ഉമ്മൻചാണ്ടിയുടെ നേതൃത്വത്തിലുള്ള യുഡിഎഫ് മന്ത്രിസഭയിൽ താനും ഗണേശ് കുമാറും ഒരുമിച്ച് മന്ത്രിമാരായിരുന്ന കാലത്തെ സംഭവങ്ങളും കെ. ബാബു കോടതിയിൽ വിശദീകരിച്ചു. ഔദ്യോഗിക വസതിയുമായി ബന്ധപ്പെട്ടുണ്ടായ വിവാദങ്ങളെത്തുടർന്ന് ഗണേശ് കുമാറിന് മന്ത്രിസ്ഥാനം രാജിവെക്കേണ്ടിവന്നിരുന്നു. അന്നത്തെ മുഖ്യമന്ത്രി ഉമ്മൻചാണ്ടിയുടെ മധ്യസ്ഥതയിലാണ് പ്രശ്നങ്ങൾ ഒത്തുതീർപ്പിലെത്തിയതെന്നും ബാബു മൊഴിയിൽ വ്യക്തമാക്കി.
രാജിക്കുശേഷം മന്ത്രിസഭയിലേക്ക് തിരിച്ചെത്താൻ ഗണേശ് കുമാർ ശ്രമിച്ചെങ്കിലും പിതാവും കേരള കോൺഗ്രസ് (ബി) നേതാവുമായിരുന്ന ആർ. ബാലകൃഷ്ണപിള്ള അതിനെ എതിർത്തിരുന്നു. ഇതിനിടെ ഗണേശ് കുമാറിനെതിരെ മറ്റൊരു പരാതിയും ഉയർന്നതോടെ അദ്ദേഹത്തെ വീണ്ടും മന്ത്രിസഭയിൽ ഉൾപ്പെടുത്താൻ ഉമ്മൻചാണ്ടി തയ്യാറായില്ല. ഈ തീരുമാനമാണ് ഗണേശ് കുമാറിന് ഉമ്മൻചാണ്ടിയോടും യുഡിഎഫ് സർക്കാരിനോടും വിരോധമുണ്ടാകാൻ കാരണമായതെന്നാണ് കെ. ബാബുവിന്റെ മൊഴി.
മന്ത്രിസഭയിലേക്കുള്ള തിരിച്ചുവരവ് തടസ്സപ്പെട്ടതിനെത്തുടർന്ന് യുഡിഎഫ് സർക്കാരിനെ പ്രതിസന്ധിയിലാക്കാനുള്ള നീക്കങ്ങൾ ഗണേശ് കുമാർ നടത്തിയെന്നും ബാബു ആരോപിച്ചു. ഇതിന്റെ ഭാഗമായാണ് സോളാർ കേസുമായി ബന്ധപ്പെട്ട ആരോപണങ്ങളിൽ ഇടപെടലുണ്ടായതെന്നാണ് കോടതിയിൽ നൽകിയ മൊഴിയിൽ പറയുന്നത്.
സോളാർ കേസിലെ പരാതിക്കാരിയായ സരിത എസ്. നായരുടെ കത്തിൽ പിന്നീട് മാറ്റങ്ങൾ വരുത്തിയെന്ന ആരോപണവും കെ. ബാബു കോടതിയിൽ ഉന്നയിച്ചു. പത്തനംതിട്ട ജയിലിൽ കഴിയുന്നതിനിടെ സരിത തയ്യാറാക്കിയ കത്തിന് ആദ്യം 21 പേജുകളാണ് ഉണ്ടായിരുന്നതെന്ന് അദ്ദേഹം വ്യക്തമാക്കി. ഈ കത്ത് അഭിഭാഷകനായ ഫെനി ബാലകൃഷ്ണനെ ഏൽപ്പിച്ചിരുന്നു. എന്നാൽ പിന്നീട് സോളാർ ജുഡീഷ്യൽ കമ്മിഷന് മുന്നിൽ ഹാജരാക്കിയപ്പോൾ കത്തിന്റെ പേജുകളുടെ എണ്ണം 25 ആയി വർധിച്ചിരുന്നുവെന്നാണ് മൊഴി.
ആദ്യത്തെ 21 പേജുകൾക്ക് പുറമേ നാല് പേജുകൾ പിന്നീട് കൂട്ടിച്ചേർത്തതാണെന്നും ഈ അധിക പേജുകളിലാണ് ഉമ്മൻചാണ്ടി ഉൾപ്പെടെയുള്ളവർക്കെതിരായ ആരോപണങ്ങൾ ഉൾപ്പെടുത്തിയിരുന്നതെന്നും കെ. ബാബു ആരോപിച്ചു. കത്തിൽ ഇത്തരത്തിൽ മാറ്റം വരുത്തിയതിന് പിന്നിൽ ഗണേശ് കുമാറിന്റെ ഇടപെടലുണ്ടായിരുന്നുവെന്നാണ് അദ്ദേഹത്തിന്റെ മൊഴി.
ഉമ്മൻചാണ്ടിക്കെതിരെ ഗുരുതര ആരോപണങ്ങൾ ഉയർത്തുന്നതിനായി സരിതയുടെ കത്ത് ഉപയോഗപ്പെടുത്തിയെന്നും ഇതിന് പിന്നിൽ രാഷ്ട്രീയ ലക്ഷ്യങ്ങളുണ്ടായിരുന്നുവെന്നുമാണ് കെ. ബാബു കോടതിയിൽ ഉന്നയിച്ച പ്രധാന ആരോപണം.
അഡ്വ. ജോളി അലക്സ് മുഖേനയാണ് കേസിലെ ഹർജി സമർപ്പിച്ചിരിക്കുന്നത്. സോളാർ കേസുമായി ബന്ധപ്പെട്ട് നേരത്തേ വലിയ രാഷ്ട്രീയ വിവാദങ്ങൾക്ക് വഴിവെച്ച ആരോപണങ്ങളിലാണ് കെ. ബാബു ഇപ്പോൾ കോടതിയിൽ മൊഴി നൽകിയിരിക്കുന്നത്. അതേസമയം, മൊഴിയിൽ ഉന്നയിച്ചിരിക്കുന്ന ഗൂഢാലോചനാ ആരോപണങ്ങൾ കോടതിയിൽ തെളിയിക്കപ്പെടേണ്ടവയാണ്.
