പ്രവാസികൾക്ക് നാട്ടിൽ വ്യവസായ സംരംഭങ്ങൾ തുടങ്ങാൻ അവസരം; മൂന്ന് കോടി രൂപ വരെ സർക്കാർ സഹായം, പുതിയ പദ്ധതിയുമായി വ്യവസായ വകുപ്പ്

തിരുവനന്തപുരം: പ്രവാസി മലയാളികളുടെയും നാട്ടിലേക്ക് മടങ്ങിയെത്തിയ പ്രവാസികളുടെയും നിക്ഷേപശേഷി സംസ്ഥാനത്തിന്റെ വ്യാവസായിക വികസനത്തിന് പ്രയോജനപ്പെടുത്താൻ പുതിയ പദ്ധതിയുമായി കേരള വ്യവസായ വകുപ്പ്. ‘നോർക്ക സ്വകാര്യ വ്യവസായ എസ്റ്റേറ്റ്’ എന്ന പേരിൽ നടപ്പാക്കുന്ന പദ്ധതിയിലൂടെ പ്രവാസികൾക്ക് കേരളത്തിൽ സ്വന്തമായി വ്യവസായ എസ്റ്റേറ്റുകളും സ്റ്റാൻഡേർഡ് ഡിസൈൻ ഫാക്ടറികളും സ്ഥാപിക്കാൻ അവസരമൊരുങ്ങും. അടിസ്ഥാനസൗകര്യ വികസനത്തിനും ഫാക്ടറി നിർമാണത്തിനുമായി നിബന്ധനകൾക്ക് വിധേയമായി പരമാവധി മൂന്ന് കോടി രൂപ വരെ സർക്കാർ ധനസഹായം ലഭിക്കും.

പ്രവാസി നിക്ഷേപം ആകർഷിക്കുന്നതിനൊപ്പം സംസ്ഥാനത്ത് ചെറുകിട, ഇടത്തരം വ്യവസായ സംരംഭങ്ങൾക്ക് കൂടുതൽ സൗകര്യങ്ങൾ ഒരുക്കുക, പുതിയ തൊഴിലവസരങ്ങൾ സൃഷ്ടിക്കുക, പ്രാദേശിക സാമ്പത്തിക വളർച്ച ശക്തിപ്പെടുത്തുക എന്നിവയാണ് പദ്ധതിയുടെ പ്രധാന ലക്ഷ്യങ്ങൾ.

പ്രവാസി മലയാളികൾക്കും നാട്ടിലേക്ക് മടങ്ങിയെത്തിയവർക്കും മാത്രമല്ല, അവരുടെ കുടുംബാംഗങ്ങൾക്കും പദ്ധതിയുടെ പ്രയോജനം ലഭിക്കും. പ്രവാസികൾക്ക് ഭൂരിപക്ഷം ഓഹരിയുള്ള കമ്പനികൾ, സഹകരണസംഘങ്ങൾ, ചാരിറ്റബിൾ സൊസൈറ്റികൾ, പങ്കാളിത്ത സ്ഥാപനങ്ങൾ, സൂക്ഷ്മ-ചെറുകിട-ഇടത്തരം സംരംഭങ്ങളുടെ (എം.എസ്.എം.ഇ.) കൺസോർഷ്യങ്ങൾ എന്നിവയ്ക്കും നിശ്ചിത മാനദണ്ഡങ്ങൾ പാലിച്ച് അപേക്ഷിക്കാം.

വ്യവസായ സംരംഭങ്ങൾ ആരംഭിക്കുന്നതിന് ആവശ്യമായ ഭൂമിയും അടിസ്ഥാനസൗകര്യങ്ങളും ഒരുക്കുന്നതിൽ സ്വകാര്യ നിക്ഷേപകരുടെ പങ്കാളിത്തം വർധിപ്പിക്കാനാണ് സർക്കാർ ശ്രമിക്കുന്നത്. പ്രവാസികൾക്ക് സ്വന്തമായി വ്യവസായ യൂണിറ്റുകൾ ആരംഭിക്കുന്നതിനൊപ്പം മറ്റ് സംരംഭകർക്ക് ആവശ്യമായ വ്യവസായ അടിസ്ഥാനസൗകര്യങ്ങൾ വികസിപ്പിക്കുന്നതിനും പദ്ധതിയിലൂടെ അവസരം ലഭിക്കും.

വ്യവസായ എസ്റ്റേറ്റുകളിലും സ്റ്റാൻഡേർഡ് ഡിസൈൻ ഫാക്ടറികളിലും റോഡുകൾ, വൈദ്യുതി, കുടിവെള്ള വിതരണം, മാലിന്യസംസ്കരണ സംവിധാനങ്ങൾ, മറ്റ് പൊതുസൗകര്യങ്ങൾ എന്നിവ ഒരുക്കുന്നതിനാണ് പ്രധാനമായും സർക്കാർ സഹായം അനുവദിക്കുക.

പദ്ധതിയുടെ ഭാഗമായി വിവിധ അടിസ്ഥാനസൗകര്യങ്ങൾക്ക് നിശ്ചയിച്ചിട്ടുള്ള പരമാവധി ധനസഹായം ഇപ്രകാരമാണ്:

• ആഭ്യന്തര റോഡുകൾ: ഏഴ് മീറ്റർ വീതിയുള്ള റോഡുകളുടെ നിർമാണത്തിന് മീറ്ററിന് 15,000 രൂപ നിരക്കിൽ പരമാവധി 75 ലക്ഷം രൂപ.

• വൈദ്യുതി സൗകര്യങ്ങൾ: സബ്‌സ്റ്റേഷൻ, വൈദ്യുതി ലൈനുകൾ എന്നിവ സ്ഥാപിക്കുന്നതിന് 40 ലക്ഷം രൂപ വരെ.

• കുടിവെള്ള വിതരണം: ജലവിതരണ സംവിധാനങ്ങൾ ഒരുക്കുന്നതിന് 40 ലക്ഷം രൂപ വരെ.

• മാലിന്യസംസ്കരണം: എഫ്‌ളുവന്റ് ട്രീറ്റ്‌മെന്റ് പ്ലാന്റ് (ഇ.ടി.പി.), കോമൺ എഫ്‌ളുവന്റ് ട്രീറ്റ്‌മെന്റ് പ്ലാന്റ് (സി.ഇ.ടി.പി.) എന്നിവയ്ക്ക് 30 ലക്ഷം രൂപ വരെ.

• മറ്റ് പൊതുസൗകര്യങ്ങൾ: വ്യവസായ എസ്റ്റേറ്റിന്റെ പ്രവർത്തനത്തിന് ആവശ്യമായ അനുബന്ധ സൗകര്യങ്ങൾക്ക് 80 ലക്ഷം രൂപ വരെ.

• സ്റ്റാൻഡേർഡ് ഡിസൈൻ ഫാക്ടറി: കെട്ടിടനിർമാണത്തിന് 1.50 കോടി രൂപ വരെ.

ഓരോ ഇനത്തിനും പ്രത്യേക പരിധി നിശ്ചയിച്ചിട്ടുണ്ടെങ്കിലും പദ്ധതിക്ക് അനുവദിക്കാവുന്ന ആകെ ധനസഹായം മൂന്ന് കോടി രൂപയിൽ കവിയില്ല. നിർമാണപ്രവർത്തനങ്ങൾ പൂർത്തിയാക്കി ചെലവുകൾ സംബന്ധിച്ച രേഖകൾ സമർപ്പിക്കുന്നതിന്റെ അടിസ്ഥാനത്തിൽ റീഇംബേഴ്സ്മെന്റ് രീതിയിലായിരിക്കും തുക അനുവദിക്കുക. സർക്കാർ നിശ്ചയിച്ചിട്ടുള്ള മറ്റ് വ്യവസ്ഥകളും പാലിക്കണം.

മൂന്ന് മുതൽ ഏഴ് ഏക്കർ വരെ ഭൂമിയുള്ളവർക്ക് സ്റ്റാൻഡേർഡ് ഡിസൈൻ ഫാക്ടറി (എസ്.ഡി.എഫ്.) സ്ഥാപിക്കുന്നതിന് അപേക്ഷിക്കാം. ഒന്നിലധികം വ്യവസായ യൂണിറ്റുകൾക്ക് ഒരേ കെട്ടിടസമുച്ചയത്തിൽ പ്രവർത്തിക്കാൻ സൗകര്യമൊരുക്കുന്ന സംവിധാനമാണിത്.

ഇത്തരത്തിലുള്ള ഫാക്ടറി സമുച്ചയങ്ങൾക്ക് കുറഞ്ഞത് 10,000 ചതുരശ്ര അടി വിസ്തീർണം ഉണ്ടായിരിക്കണം. ഓരോന്നിനും കുറഞ്ഞത് 1,000 ചതുരശ്ര അടി വിസ്തീർണമുള്ള അഞ്ച് നിർമാണ യൂണിറ്റുകളെങ്കിലും സമുച്ചയത്തിൽ സജ്ജീകരിക്കണം.

വ്യവസായ സംരംഭകർക്ക് പ്രത്യേകം വലിയ കെട്ടിടങ്ങൾ നിർമിക്കേണ്ട സാഹചര്യം ഒഴിവാക്കി, ആവശ്യമായ അടിസ്ഥാനസൗകര്യങ്ങളുള്ള സ്ഥലത്ത് പ്രവർത്തനം ആരംഭിക്കാൻ സഹായിക്കുന്നതാണ് ഈ മാതൃക.

സ്റ്റാൻഡേർഡ് ഡിസൈൻ ഫാക്ടറി നിർമാണത്തിനും അനുബന്ധ അടിസ്ഥാനസൗകര്യ വികസനത്തിനുമായി ആകെ മൂന്ന് കോടി രൂപ വരെ റീഇംബേഴ്സ്മെന്റ് സഹായം ലഭിക്കാം.

ഏഴ് ഏക്കറിൽ കൂടുതൽ മുതൽ 15 ഏക്കർ വരെ ഭൂമിയുള്ളവർക്ക് സ്വകാര്യ വ്യവസായ എസ്റ്റേറ്റ് സ്ഥാപിക്കാൻ അപേക്ഷിക്കാം. ഇതിനായി അപേക്ഷകന്റെ ഉടമസ്ഥതയിലുള്ള ഭൂമിയോ കുറഞ്ഞത് 30 വർഷത്തെ പാട്ടാവകാശമുള്ള ഭൂമിയോ ഉണ്ടായിരിക്കണം.

ഒന്നിലധികം വ്യവസായ സംരംഭങ്ങൾക്ക് ഒരേ പ്രദേശത്ത് പ്രവർത്തിക്കാൻ ആവശ്യമായ അടിസ്ഥാനസൗകര്യങ്ങൾ വികസിപ്പിക്കുന്നതാണ് വ്യവസായ എസ്റ്റേറ്റുകളുടെ പ്രധാന സവിശേഷത.

എന്നാൽ എല്ലാ വിഭാഗത്തിലുമുള്ള ഭൂമിയും പദ്ധതിക്കായി ഉപയോഗിക്കാൻ അനുവദിക്കില്ല. കേരള നെൽവയൽ-തണ്ണീർത്തട സംരക്ഷണ നിയമത്തിന്റെ പരിധിയിൽ വരുന്ന ഭൂമി, പരിസ്ഥിതിലോല മേഖലകൾ (ഇ.എസ്.എ.), തീരദേശ നിയന്ത്രണ മേഖലകൾ (സി.ആർ.ഇസഡ്.), തോട്ടഭൂമി എന്നിവ പദ്ധതിക്കായി ഉപയോഗിക്കുന്നതിന് നിയന്ത്രണമുണ്ടാകും.

ഭൂമിയുടെ നിയമപരമായ സ്ഥിതിയും വ്യവസായ ആവശ്യങ്ങൾക്ക് ഉപയോഗിക്കാനുള്ള യോഗ്യതയും ബന്ധപ്പെട്ട അധികൃതരുടെ പരിശോധനയ്ക്ക് വിധേയമായിരിക്കും.

വ്യവസായ എസ്റ്റേറ്റുകൾ സ്ഥാപിക്കുന്നതിനുള്ള നടപടിക്രമങ്ങൾ ലളിതമാക്കുന്നതിനും അനുമതികൾ വേഗത്തിൽ ലഭ്യമാക്കുന്നതിനും പ്രത്യേക സംവിധാനവും പദ്ധതിയിൽ ഉൾപ്പെടുത്തിയിട്ടുണ്ട്.

വ്യവസായ എസ്റ്റേറ്റ് ഡെവലപ്പർ പെർമിറ്റിനൊപ്പം ഓരോ നോർക്ക സ്വകാര്യ വ്യവസായ എസ്റ്റേറ്റിനും പ്രത്യേക ഏകജാലക ക്ലിയറൻസ് ബോർഡ് രൂപീകരിക്കും. കെട്ടിടനിർമാണാനുമതി ഉൾപ്പെടെയുള്ള വിവിധ വകുപ്പുകളുടെ അനുമതികൾ ഏകോപിപ്പിച്ച് നടപടിക്രമങ്ങളിലെ കാലതാമസം കുറയ്ക്കുകയാണ് ഇതിലൂടെ ലക്ഷ്യമിടുന്നത്.

പദ്ധതി സമയബന്ധിതമായി നടപ്പാക്കുന്നതിനും വ്യക്തമായ വ്യവസ്ഥകൾ നിശ്ചയിച്ചിട്ടുണ്ട്. ഡെവലപ്പർ പെർമിറ്റ് ലഭിച്ച് രണ്ട് മാസത്തിനകം കെട്ടിടനിർമാണാനുമതിക്കായി അപേക്ഷിക്കണം. മൂന്ന് മാസത്തിനകം നിർമാണപ്രവർത്തനങ്ങൾ ആരംഭിക്കുകയും രണ്ട് വർഷത്തിനുള്ളിൽ പദ്ധതി പൂർത്തിയാക്കുകയും വേണം.

ഈ സമയപരിധികൾ പാലിക്കുന്നതിലൂടെ അനുമതി നേടിയശേഷം പദ്ധതികൾ അനിശ്ചിതമായി നീണ്ടുപോകുന്നത് ഒഴിവാക്കാനാണ് സർക്കാർ ഉദ്ദേശിക്കുന്നത്.

പരിസ്ഥിതി സംരക്ഷണത്തിനും പദ്ധതിയിൽ പ്രത്യേക പരിഗണന നൽകിയിട്ടുണ്ട്. മലിനീകരണസാധ്യത കൂടുതലുള്ള റെഡ് കാറ്റഗറിയിൽ ഉൾപ്പെടുന്ന വ്യവസായങ്ങൾക്ക് നോർക്ക സ്വകാര്യ വ്യവസായ എസ്റ്റേറ്റുകളിൽ പ്രവർത്തനാനുമതി നൽകില്ല.

പരിസ്ഥിതി മാനദണ്ഡങ്ങൾ പാലിക്കുന്നതും പ്രാദേശിക സാഹചര്യങ്ങൾക്ക് അനുയോജ്യവുമായ വ്യവസായ സംരംഭങ്ങൾക്കായിരിക്കും മുൻഗണന. മാലിന്യസംസ്കരണത്തിനും മറ്റ് പൊതുസൗകര്യങ്ങൾക്കും ധനസഹായം അനുവദിക്കുന്നതും പരിസ്ഥിതി സൗഹൃദ വ്യവസായ വികസനം പ്രോത്സാഹിപ്പിക്കുന്നതിന്റെ ഭാഗമാണ്.

വിദേശരാജ്യങ്ങളിൽ തൊഴിലെടുത്തും ബിസിനസ് നടത്തിയും സമ്പാദിച്ച മൂലധനവും സംരംഭക പരിചയവും കേരളത്തിന്റെ വ്യാവസായിക വളർച്ചയ്ക്ക് പ്രയോജനപ്പെടുത്താനുള്ള അവസരമാണ് പുതിയ പദ്ധതി തുറന്നുനൽകുന്നത്.

പ്രവാസികൾക്ക് നാട്ടിൽ സംരംഭങ്ങൾ ആരംഭിക്കാൻ താൽപര്യമുണ്ടെങ്കിലും ഭൂമി, അടിസ്ഥാനസൗകര്യങ്ങൾ, വിവിധ വകുപ്പുകളുടെ അനുമതികൾ, പ്രാരംഭ നിക്ഷേപച്ചെലവ് തുടങ്ങിയവ പലപ്പോഴും വെല്ലുവിളികളാകാറുണ്ട്. ഇത്തരം പ്രതിസന്ധികൾക്ക് പരിഹാരം കണ്ടെത്തുന്നതിനാണ് സർക്കാർ ധനസഹായവും ഏകജാലക അനുമതി സംവിധാനവും ഉൾപ്പെടുത്തിയിരിക്കുന്നത്.

വ്യവസായ എസ്റ്റേറ്റുകളും ഫാക്ടറി സമുച്ചയങ്ങളും യാഥാർഥ്യമാകുന്നതോടെ ചെറുകിട, ഇടത്തരം സംരംഭങ്ങൾക്ക് കൂടുതൽ പ്രവർത്തനസൗകര്യങ്ങൾ ലഭിക്കുമെന്നാണ് പ്രതീക്ഷ. ഗ്രാമീണ, നഗര മേഖലകളിൽ പുതിയ വ്യവസായ യൂണിറ്റുകൾ ആരംഭിക്കാനും അതുവഴി പ്രാദേശികതലത്തിൽ നേരിട്ടും പരോക്ഷമായും തൊഴിലവസരങ്ങൾ വർധിപ്പിക്കാനും പദ്ധതി സഹായകമായേക്കും.

പ്രവാസികളുടെ സമ്പാദ്യം ഉൽപാദനമേഖലയിലേക്ക് ആകർഷിക്കുകയും സംസ്ഥാനത്ത് ദീർഘകാല നിക്ഷേപങ്ങൾക്ക് അനുകൂലമായ അന്തരീക്ഷം സൃഷ്ടിക്കുകയും ചെയ്യുകയെന്നതാണ് ‘നോർക്ക സ്വകാര്യ വ്യവസായ എസ്റ്റേറ്റ്’ പദ്ധതിയിലൂടെ വ്യവസായ വകുപ്പ് ലക്ഷ്യമിടുന്നത്.