ബെനിൻ സിറ്റിയിൽ നിന്ന് ലാഗോസിലേക്ക് പറന്ന ATR-42 വിമാനം ഒൻഡോ സംസ്ഥാനത്ത് തകർന്നു; അപകടകാരണം കണ്ടെത്താൻ സമഗ്ര അന്വേഷണത്തിന് പ്രസിഡന്റ് ബോല ടിനുബുവിന്റെ ഉത്തരവ്
അബൂജ: തെക്കൻ നൈജീരിയയെ നടുക്കി വൻ വിമാനാപകടം. ബെനിൻ സിറ്റിയിൽ നിന്ന് രാജ്യത്തിന്റെ സാമ്പത്തിക കേന്ദ്രമായ ലാഗോസിലേക്ക് പറക്കുകയായിരുന്ന സൈനിക വിമാനം ഒൻഡോ സംസ്ഥാനത്തെ ഇഗ്ബോകോഡ പ്രദേശത്ത് തകർന്നുവീണു. വിമാനത്തിലുണ്ടായിരുന്ന 25 യാത്രക്കാരും ഏഴ് ജീവനക്കാരും ഉൾപ്പെടെ 32 പേരും മരിച്ചതായാണ് റിപ്പോർട്ട്.
തിങ്കളാഴ്ച രാവിലെ ഒൻപത് മണിക്ക് തൊട്ടുപിന്നാലെയാണ് അപകടമുണ്ടായത്. ഇഗ്ബോകോഡയിലെ ഒരു നാവിക താവളത്തിന് സമീപമാണ് വിമാനം തകർന്നുവീണതെന്ന് അധികൃതർ അറിയിച്ചു. അപകടവിവരം പുറത്തുവന്നതിന് പിന്നാലെ രക്ഷാപ്രവർത്തകരും സുരക്ഷാ ഉദ്യോഗസ്ഥരും സ്ഥലത്തെത്തി തിരച്ചിൽ ആരംഭിച്ചു.
അപകടത്തിൽപ്പെട്ടത് ഇരട്ട എൻജിൻ ടർബോപ്രോപ്പ് വിഭാഗത്തിൽപ്പെടുന്ന ATR-42 വിമാനമാണെന്നാണ് അധികൃതർ നൽകുന്ന വിവരം. സാധാരണയായി 30 മുതൽ 50 വരെ യാത്രക്കാരെ വഹിക്കാൻ ശേഷിയുള്ള വിമാനമാണിത്.
വിമാനം തകർന്നുവീണ പ്രദേശം നദിയും ചതുപ്പുനിലങ്ങളും നിറഞ്ഞ മേഖലയായതിനാൽ രക്ഷാപ്രവർത്തനം ഏറെ ദുഷ്കരമായി. ബോട്ടുകളുടെ സഹായത്തോടെയാണ് രക്ഷാസംഘങ്ങൾ അപകടസ്ഥലത്തേക്ക് എത്തിയത്. പ്രദേശവാസികളും രക്ഷാപ്രവർത്തനത്തിൽ പങ്കാളികളായി.
ചതുപ്പുനിലത്ത് മീൻപിടിക്കുകയായിരുന്ന ഒരാളാണ് വിമാനം തകർന്നുവീണ വിവരം ആദ്യം സമീപത്തെ നാവിക താവളത്തെയും നാട്ടുകാരെയും അറിയിച്ചതെന്നാണ് റിപ്പോർട്ട്.
അപകടസ്ഥലത്തുനിന്ന് ഏകദേശം ഒരു കിലോമീറ്റർ അകലെ താമസിക്കുന്ന ദയോ അകിന്റേ എന്ന പ്രദേശവാസി, പെട്ടെന്ന് വലിയൊരു സ്ഫോടനശബ്ദം കേട്ടതായി പറഞ്ഞു. ആദ്യം ഇടിമിന്നലാണെന്നാണ് കരുതിയതെന്നും പിന്നീട് വിമാനാപകടമാണെന്ന് മനസ്സിലായെന്നും അവർ വ്യക്തമാക്കി. അപകടത്തിനുശേഷം പ്രദേശത്തിന് മുകളിലൂടെ നിരവധി വിമാനങ്ങൾ പറക്കുന്നതും കണ്ടതായി അവർ പറഞ്ഞു.
നൈജീരിയൻ പ്രസിഡന്റ് ബോല ടിനുബു അപകടത്തിൽ മരിച്ചവരുടെ കുടുംബങ്ങളെ അനുശോചിച്ചു. രാജ്യത്തിന് ഏറെ വേദനാജനകമായ സംഭവമാണിതെന്നും ദുരന്തത്തിൽ പ്രിയപ്പെട്ടവരെ നഷ്ടപ്പെട്ട കുടുംബങ്ങൾക്കൊപ്പം രാജ്യം നിലകൊള്ളുന്നുവെന്നും പ്രസിഡന്റിന്റെ ഓഫീസ് അറിയിച്ചു.
വിമാനം തകർന്നുവീഴാനിടയായ സാഹചര്യം കണ്ടെത്താൻ സമഗ്ര അന്വേഷണത്തിനും പ്രസിഡന്റ് ഉത്തരവിട്ടിട്ടുണ്ട്. വിമാനത്തിന്റെ സാങ്കേതിക തകരാർ, കാലാവസ്ഥ, പറക്കലുമായി ബന്ധപ്പെട്ട മറ്റ് സാഹചര്യങ്ങൾ എന്നിവ ഉൾപ്പെടെ അപകടത്തിലേക്ക് നയിച്ച ഘടകങ്ങൾ അന്വേഷണവിധേയമാകുമെന്നാണ് സൂചന.
അപകടത്തിന്റെ കൃത്യമായ കാരണം കണ്ടെത്തുന്നതിനൊപ്പം സമാനമായ ദുരന്തങ്ങൾ ആവർത്തിക്കാതിരിക്കാൻ സ്വീകരിക്കേണ്ട സുരക്ഷാ നടപടികൾ നിർദേശിക്കുകയെന്നതും അന്വേഷണത്തിന്റെ പ്രധാന ലക്ഷ്യമായിരിക്കും.
